रंग लावत हे छत्तीसगढ़ म महिला मन के आर्थिक सशक्तिकरण के पहल

सूरजपुर, 19 जून 2021। छत्तीसगढ़ म पर्यटन ले महिला मन के आर्थिक सशक्तिकरण के पहल रंग लावत हे। सूरजपुर जिला के केनापारा पर्यटन केन्द्र म फ्लोटिंग रेस्टोरेंट के संग बोटिंग के सुविधा उपलब्‍ध कराके रोजगार के नवा अवसर सृजित करे गए हे। एमां महिला मन ल बोटिंग के संग आन आजीविका संबंधी गतिविधि मन ले जोड़े गए हे।
सूरजपुर जिला म विकास काम मन के लोकार्पण अऊ भूमिपूजन कार्यक्रम म मुख्यमंत्री श्री भूपेश बघेल ले बात करत शिवशक्ति महिला ग्राम संगठन के सुश्री उषा रजक ह बताइस कि समूह के महिला मन केनापारा पर्यटन स्थल म बोटिंग के काम करथें। ऊंखर संगठन म 286 महिला जुड़े हें। ओ मन ल बोटिंग ले अब तक 16 लाख 71 हजार 190 रूपिया के आमदनी होए हे। समूह के हर एक महिला ल हर महिना 7 हजार के आमदनी हो जाथे। सुश्री उषा ह बताइस कि वो घलोक बोट चलाथे अऊ मुख्यमंत्री श्री बघेल के उहां प्रवास के समय ओ ल घलोक बोटिंग कराए रहिस। एखर संगेच सुश्री उषा ह मुख्यमंत्री श्री बघेल ल फेर भ्रमण बर आए के निवेदन करिस। मुख्यमंत्री श्री बधेल ह सूरजपुर कलेक्टर ले पर्यटन स्थल म बोटिंग के व्यवस्था के संग रहे बर हट बनवाए बर कहिन। कार्यक्रम के समय बताए गीस कि केनापारा ल विकसित करे के रूपरेखा तियार कर लेहे गए हे अऊ ओखर मुताबिक केनापारा पर्यटन स्थल ल विकसित करे जाही।