पंडित माधवराव सप्रे ह छत्तीसगढ़ म पत्रकारिता ल दीस नवा दिशा : दाउ बघेल

रइपुर, 18 जून 2021 शुकवार। मुख्यमंत्री दाउ भूपेश बघेल ह छत्तीसगढ़ म पत्रकारिता के जनक अउ साहित्यकार पंडित माधवराव सप्रे के जयंती 19 जून के उन ल सुरता करत कहीन कि सप्रे जी के रचनात्मक अउ मूल्यपरक लेखन ह छत्तीसगढ़ म पत्रकारिता ल एक नवा दिशा दीन हे। उन्कर राखे नेह म ही आज छत्तीसगढ़ के पत्रकारिता समृद्ध होवत हे। सन् 1900 म जब प्रकाशन बर पर्याप्त सुविधा अउ और आधुनिक तकनीकी नई रिहिसे, उन्मन वामनराव लाखे जी अउ रामराव चिंचोलकर जी के सहयोग ले पेण्ड्रा म मासिक हिन्दी पत्रिका ‘छत्तीसगढ़ मित्र‘ के सम्पादन अउ प्रकाशन शुरू करीन। सप्रे जी द्वारा रचित कहानी ‘टोकरी भर मिट्टी‘ ल भारतीय साहित्य म हिन्दी के पहिली मौलिक कहानी के गौरव पाए हवय।
अपन लेखनी ले छत्तीसगढ़ म राष्ट्रीय अउ साहित्यिक चेतना ल बढ़ाए म तको सप्रे जी के अमूल्य योगदान रिहिसे। स्वतंत्रता संग्राम के बेरा उन्कर लेखनी ह सैकड़ों सत्याग्रही मन के मार्गदर्शन करीन अउ राष्ट्रप्रेम के प्रेरणा दीन। सप्रे जी जिनगी भर देश अउ साहित्य सेवा म लगे रहीन। उन्कर कई ठन लेख अउ रचना मन प्रकाशित होइन। उनमन अबड़ अकन संस्था ल जन्म दीन उन्कर माध्यम ले लोगन देश अउ जन सेवा बर आगू आइन। मुख्यमंत्री ह कहीन कि सप्रे जी के व्यक्तित्व अउ कृतित्व साहित्यकार अउ पत्रकार मन के संगे संग आम जनता बर तको प्रेरणादायक हवय।