जिला म मुख्यमंत्री वृक्षारोपण प्रोत्साहन योजना ले 70 एकड़ जमीन म फलदार पौधा मन के मिश्रित उद्यान होही विकसित

राजनांदगांव, 13 जुलाई 2021। जिला म मुख्यमंत्री वृक्षारोपण प्रोत्साहन योजना ले गांव मन म कई प्रजाति के फलदार पौधा मन के मिश्रित उद्यान विकसित होही। वृक्षारोपण ल बढ़ावा देहे के शासन के ये योजना न केवल पर्यावरण संरक्षण अऊ संवर्धन के दिशा म कारगर हे भलुक ग्रामीण अर्थव्यवस्था ल मजबूत करे बर घलोक परिणाममूलक हे। एक संग जब फलदार वृक्ष हराभरा उद्यान म तब्दील होही त ये अनूठा प्रयास सार्थक साबित होही। कलेक्टर श्री तारन प्रकाश सिन्हा के मार्गदर्शन म शासन के ये योजना के तहत ग्राम पंचायत मन म सघन पौधा रोपण करे जात हे। जिला म 70 एकड़ जमीन म 7 हजार 500 पौधा लगाए जात हे अऊ ये दिशा म सरलग काम करे जात हे। शासकीय जमीन म ग्राम पंचायत मन कोति ले कटहल, अमरूद, जामुन, नींबू, मुनगा, आम के फलदार पौधे लगाए जात हे। अंबागढ़ चौकी विकासखंड के ग्राम पंचायत सोनसायटोला, छुईखदान विकासखंड के ग्राम कुटेलीकला, छुरिया विकासखंड के ग्राम भर्रीटोला ब, खैरागढ़ विकासखंड के ग्राम बलदेवपुर, डोंगरगांव विकासखंड के ग्राम रायतापायली, डोंगरगढ़ विकासखंड के लाल बहादुर नगर, मोहला विकासखंड के ग्राम घावड़ेटोला, मानपुर विकासखंड के ग्राम औंधी अऊ राजनांदगांव विकासखंड के गांव इंदावानी म सघन पौधरोपण के काम करे जात हे। मुख्यमंत्री वृक्षारोपण प्रोत्साहन योजना के तहत वृक्षारोपण करे म प्रति एकड़ 10 हजार रूपिया के मान ले ग्राम पंचायत मन ल आदान सहायता मिलही अऊ 3 साल तक ये आदान सहायता प्राप्त होही। जेखर से ग्राम पंचायत मन के आय म बढ़ोतरी होही। ग्राम पंचायत मन ही मिश्रित उद्यान के रखरखाव करहीं। अवइया बछर म ग्राम पंचायत चाहंय त भूमिहीन कृषक अऊ महिला स्वसहायता समूह ल काम बर दे सकत हें। उद्यानिकी अऊ वन विभाग कोति ले पौधा उपलब्‍ध कराए जात हे। तकनीकी मार्गदर्शन उद्यानिकी विभाग अऊ एखर बर काम एजेंसी ग्राम पंचायत हे।