गांव म किराना दुकान संचालन करके अनिता बनिस आत्मनिर्भर

बीजापुर, 17 जुलाई 2021। भोपालपटनम ब्लॉक के कोनागुड़ा निवासी श्रीमती अनिता चिकुड़ ह खुद ल रोजगार ले जोड़े ललक संग गांव के जरूरत ल देखत शासन के योजना ले लाभान्वित होके गांव म किराना दुकान चलात हे। ये किराना दुकान ले जिहां गांव के मनखे मन ल जरूरी चीज सुलभ होवत हे। उहें अनिता गांव वाले मन ल जरूरी सामान मुहैय्या करके खुद ल गौरवान्वित महसूस करत हे। श्रीमती अनिता ह बताइस कि वोखर पति जिला शिक्षा अधिकारी कार्यालय बीजापुर म कलेक्टर दर म भृत्य के नौकरी म कार्यरत हे, फेर वोखर मासिक वेतन बहुतेच कम होए के सेती परिवार चलाय म काफी कठिनाई होवत रहिस। अनिता ह बताइस कि अपन पति के संग घर के आर्थिक स्थिति म सुधार उपर चर्चा करत बेरा कोनागुड़ा म कोनो किराना के दुकान नइ रहे के सेती जरूरी चीज अऊ राशन ले संबंधित व्यवसाय चालू करे के विचार आइस। एला ध्यान म रखके अनिता ह किराना दुकान के व्यवसाय बर जिला व्यापार अऊ उद्योग केन्द्र बीजापुर ले सम्पर्क करके मुख्यमंत्री युवा स्वरोजगार योजनांतर्गत साल 2020 म ऋण बर आवेदन करिस। विभाग कोति ले आवेदन ल गांव के नजदीकी पंजाब नेशनल बैंक संगमपल्ली ल प्रेषित करके 1 लाख रूपिया के ऋण स्वीकृत कराइस। स्वीकृति उपरांत अनिता ल 6 दिवस के उद्यमिता प्रशिक्षण प्रदान करके संबंधित बैंक ले ऋण वितरण घलोक कराए गीस, काबर कि अनिता अनुसूचित जनजाति वर्ग ले होए के सेती स्वीकृत राशि के 25 प्रतिशत के दर ले अनुदान राशि 25 हजार रूपिया विभाग कोति ले प्रदाय करे गीस।
अनिता के बताती अभी हाल म किराना व्यवसाय ले हर महिना करीबन 6 हजार रूपिया तक के आमदनी होवत हे जेखर से बैंक के किश्त के घलोक समय म भुगतान करत हे। वो ह दुकान संचालित करे के संगेच खाली समय म सिलाई के घलोक काम करत हे जेखर से परिवार के आर्थिक स्थिति म सुधार होए होवत हे अऊ अब वो आत्मनिर्भरता कोतिफ अग्रसर हो गे हे।