सहकारिता आंदोलन म किसान मन संग नागरिक मन तको जुड़ै – दाउ भूपेश बघेल

रइपुर 23 जुलाई 2021 शुकवार। मुख्यमंत्री दाउ भूपेश बघेल ह कहीन कि प्रदेश म किसान मन के हित म अबड़ अकन सहकारी गतिविधि संचालित करे जावत हे। राज्य सरकार के ये उदीम हे कि अधिक ले अधिक लोगन सहकारिता के माध्यम ले लाभान्वित होंवयं। सहकारिता आंदोलन म किसान मन संग ज्यादा ले ज्यादा नागरिक जुड़ै ये प्रयास होना चाही। मुख्यमंत्री दाउ भूपेश बघेल अपन घरू कार्यालय ले बेलासपुर म आयोजित जिला सहकारी केंद्रीय बैंक बेलासपुर के अध्यक्ष के पदभार ग्रहण कार्यक्रम ल वीडियो कॉन्फ्रेंसिंग के जरिया सम्बोधित करत रिहिन हे।
जिला सहकारी केंद्रीय बैंक बेलासपुर के नवनियुक्त अध्यक्ष श्री प्रमोद नायक के पदभार ग्रहण कार्यक्रम आज सहकारी बैंक बेलासपुर के अंगना म संपन्न होइस। जेमा सहकारिता मंत्री डॉ. प्रेमसाय सिंह टेकाम विशेष रूप से उपस्थित रिहिन। ये बेरा म मुख्यमंत्री ह बैंक के अध्यक्ष श्री प्रमोद नायक ल बधई अउ शुभकामना दीन। उन मन कहीन कि सहकारिता अधिनियम म अबड़ अकन संशोधन करके अधिनियम के सरलीकरन करे गे हे, जेकर ले सहकारिता आंदोलन ले जादा ले जादा लोगन लाभान्वित हो सकैं।
कार्यक्रम म उपस्थित सहकारिता मंत्री डॉ. प्रेमसाय सिंह टेकाम ह अपन संबोधन म कहीन कि छत्तीसगढ़ सरकार के किसान मन के हित बर अभिनव योजना लाए हे जेकर ले छत्तीसगढ़ मॉडल राज्य बनत हे। सहकारिता आंदोलन किसान मन बर जरूरी हे। राज्य म समिति मन के संख्या 1300 ले बाढ़के 2058 हो गे हे। किसान मन के ऋण माफी करे गे हे। राजीव गांधी किसान न्याय योजना, मुख्यमंत्री गोधन न्याय योजना ले किसान मन के आर्थिक स्थिति ल पोठ बनाए के बूता करे गे हे।