रइपुर, 28 जुलाई 2021 बुधवार। मुख्यमंत्री दाउ भूपेश बघेल ले आज उन्कर घरू कार्यालय म चन्दूलाल चन्द्राकर स्मृति चिकित्सा महाविद्यालय दुर्ग म पढ़इया छात्र अउ उन्कर पालक मन ह मुलाकात करीन। पालक मन ह मेडिकल कॉलेज म पढ़त बच्चा मन के भविष्य ल सुरक्षित करे के उद्देश्य ले राज्य शासन कोति ले करे जावत पहल अउ कॉलेज के अधिग्रहण के निर्णय बर मुख्यमंत्री दाउ भूपेश बघेल के आभार जताईन। मुख्यमंत्री ह कहीन कि बच्चा मन हमार भविष्य हरे। इन्कर भविष्य ल बने बनाए बर शासन हर संभव प्रयास करही।
जानबा होवय कि चंदूलाल चंद्राकर स्मृति चिकित्सा महाविद्यालय दुर्ग म 2017 बैच के 180 छात्र चतुर्थ वर्ष में पढ़त हे। इहां इन बच्चा मन के अध्यापन कार्य प्रभावित होए के सेति मुख्यमंत्री दाउ भूपेश बघेल के पहल म राज्य शासन कोति ले बच्चा मन आने मान्यता पाए मेडिकल कॉलेज म फेर आबंटन (रिएलोकेट) करे के आदेश छत्तीसगढ़ शासन के चिकित्सा शिक्षा विभाग कोति ले जारी करे गे हे। हॉस्पिटल बोर्ड के राज्य अध्यक्ष अउ आईएमए मेडिकल स्टूडेंट नेटवर्क के राज्य संयोजक डॉ. राकेश गुप्ता ह मुख्यमंत्री दाउ बघेल ल बताईन कि 2017 के पहिली बैच के लगभग 300 मेडिकल छात्र इंटर्नशिप पूरा करत हावय, अब वोमन पीजी नीट के परीक्षा म बैठही। छत्तीसगढ़ सरकार के ये पहल अउ संवेदनशीलता ले 480 छात्रमन के भविष्य सुरक्षित होगे ।
जानबा होवय कि छत्तीसगढ़ सरकार कोति ले राज्य के जनता, छात्र मन के हित अउ प्रदेश म लउहे होवत चिकित्सा शिक्षा के विस्तार के उद्देश्य ले चन्दूलाल चन्द्राकर स्मृति चिकित्सा महाविद्यालय दुर्ग के अधिग्रहण के निर्णय लेहे गे हवय।
