बिहान दीदी मन के हौसला के आगू लोहा तको परिस नरम

रइपुर, 28 जुलाई 2021 बुधवार। छत्तीसगढ़ के माइलोगन मन अब पुरूष मन के बेवसाय माने जावत कइयोंन क्षेत्र अपनाके आत्मनिर्भर बनत हे। महासमुन्द जिला के विकासखंड बागबाहरा के अंदरूनी गाँव कोमाखान म छत्तीसगढ़ राज्य ग्रामीण आजीविका मिशन के तहत संचालित बिहान के दीदी मन लोहा के तार फेंसिंग के निर्माण म जुड़गे हवय। एकता महिला स्व-सहायता समूह के ये दीदी मन के हौसला के आगू लोहा तको नरम पड़ गे हवय । बिहान समूह के दीदी मन ह कुछ महीना म ही 169 बण्डल फेंसिंग तार के विक्रय करके एक लाख 90 हजार 365 रूपए के आमदनी अर्जित करे हवय। इन्कर बनाए फेंसिंग तार के सरकारी अउ गैर सरकारी संस्था मन अबड़ माँग हवय।
माइलोगन मन फेसिंग तार के संग आचार, पापड़, निरमा, साबुन, फिनाइल के तको निर्माण करत हावयं । राज्य ग्रामीण आजीविका मिशन के तहत महासमुंद जिला म 5 हजार 223 महिला स्व-सहायता समूह काम करत हावयं। एमे 55 हजार 910 माइलोगन मोमबत्ती, दीया, वाशिंग पाउडर, फिनॉयल, बाँस के टुकनी संग अउ आने सामग्री बनाके आत्मनिर्भर बनत हें। एकरे संग बिहान दीदी मन सिलाई-कढ़ाई करे, जैविक खाद बनाए अउ खुद बनाए सामान मन ल बजार म बेचे के बूता करथे।