रइपुर, 5 अगस्त 2021 बिरस्पत। मुख्यमंत्री दाउ भूपेश बघेल कहीन कि खेती-किसानी ल पोठ बनाके अउ हर हाथ ल काम देके गांव के जुन्ना गौरव ल फेर स्थापित करना राज्य सरकार के लक्ष्य हे। ग्रामीण अर्थव्यवस्था ल पोठ बनाए बर राजीव गांधी किसान न्याय योजना, सुराजी गांव योजना, गोधन न्याय योजना जइसन कदम उठाए गे हवय। दाउ बघेल आज यहां अपन घरू कार्यालय ले छत्तीसगढ़ राज्य कृषक कल्याण परिषद के नवनियुक्त पदाधिकारी मन के पदभार ग्रहण के वर्चुअल कार्यक्रम ल सम्बोधित करत रिहिन। मुख्यमंत्री ह ये बेरा म शहीद महेन्द्र कर्मा जयंती म उन ल सुरता करत नमन करीन।
कार्यक्रम म कृषि अउ जल संसाधन मंत्री श्री रविन्द्र चौबे, छत्तीसगढ़ राज्य खनिज विकास निगम के अध्यक्ष श्री गिरीश देवांगन, मुख्यमंत्री निवास म अउ सहकारिता मंत्री डॉ.प्रेमसाय सिंह टेकाम, खाद्य मंत्री श्री अमरजीत भगत, छत्तीसगढ़ कृषक कल्याण परिषद के अध्यक्ष श्री सुरेन्द्र शर्मा, छत्तीसगढ़ राज्य गौ सेवा आयोग के अध्यक्ष महंत श्री रामसुंदर दास, छत्तीसगढ़ बीज विकास निगम के अध्यक्ष श्री अग्नि चंद्राकर अउ छत्तीसगढ़ योग आयोग के अध्यक्ष श्री ज्ञानेश शर्मा, बीज निगम के कार्यालय म उपस्थित रिहिन। कार्यक्रम म कृषक कल्याण परिषद के उपाध्यक्ष श्री महेंद्र चंद्राकर, सदस्य सर्वश्री बसंत टाटी, नागेंद्र नेगी, संजय गुप्ता, भगवान पटेल, जानकीराम सेठिया, नंद कुमार पटेल, डेहराराम साहू, खम्मन पटेल, जगदीश दीपक, शरद यादव, श्रवण चंद्राकर, चुन्नी लाल वर्मा अउ श्रीमती शशि गौर ह पदभार ग्रहण करीन।
मुख्यमंत्री ह परिषद के नवनियुक्त सबो पदाधिकारी मन ल बधाई अउ शुभकामना देवत उन ल राज्य सरकार के योजना मन के जानकारी हरेक किसान तक पहुंचाए, गौठान मन ल अउ अधिक सक्रिय करे के जिम्मेदारी सौंपीन। उन कहीन कि परिषद के पदाधिकारी हरेली त्यौहार गौठान मन म जाके मनावयं। जब भी वोमन गांव के दौरा म जावयं त गौठान मन म बैठक करके उहां के गतिविधि मन के समीक्षा तको करयं अउ ये संबंध म सुझाव ले अवगत करावयं। गौठान मन ल अलग-अलग गतिविधि ले जोड़य अउ येहू देखै कि गौठान मन म नेपियर घास लगाए गे हे कि नहीं अउ मवेशी मन बर चारा-पानी के बेवस्था हे कि नहीं।
उन कहीन कि वनवासी मन ल तेेंदूपत्ता संग्रहण बर प्रति मानक बोरा 4000 रूपिया मिलत हावे। एकर ले गांव के लोगन के आर्थिक स्थिति पोठ होवत हावय।
बीजापुर जिला म बछर 2018 म जिहां एक ट्रेक्टर बेचाए रिहिस, उहेंचे ऋण माफी अउ 25 सौ रूपिया प्रति क्विंटल म धान खरीदी के बाद बीजापुर जिला म बछर 2019-20 म 73 ट्रेक्टर अउ 1235 मोटर सायकल अउ एक ठन कमर्शियल ट्रेक्टर के बिक्री होइस । पीछे बछर ये जिला म 60 ट्रेक्टर अउ 1998 मोटर सायकल अउ तीसरइया साल म 133 ट्रेक्टर, 968 मोटर सायकल के बिक्री अब तक हो चुके हवय। येमे 11 कमर्शियल ट्रेक्टर के बिक्री तको शामिल हवय।
कृषि मंत्री श्री रविन्द्र चौबे ह कहीन कि कृषि के विकास छत्तीसगढ़ के विकास के मूल आधार हरे। छत्तीसगढ़ सरकार मुख्यमंत्री के नेतृत्व म कृषि अउ किसान मन के संगे-संग गरीब मन के आर्थिक उन्नति बर बूता करत हावय। ये दिशा म राजीव गांधी भूमिहीन कृषि मजदूर न्याय योजना लागू करे के क्रांतिकारी पहल तको होगे हवय। बजट म ये योजना बर प्रावधान तको करे गे हवय।
गांव के जुन्ना गौरव ल फेर स्थापित करना राज्य सरकार के लक्ष्य : मुख्यमंत्री दाउ भूपेश बघेल
