मुख्यमंत्री श्री भूपेश बघेल ले किसान प्रतिनिधि मन ह करिन मुलाकात : जैविक खेती बर किसान मन ल प्रोत्साहित करे के अपील

रायपुर, 14 अगस्त 2021। मुख्यमंत्री श्री भूपेश बघेल ले काली ऊंखर निवास कार्यालय म राजनांदगांव जिला ले आए जनप्रतिनिधि अउर किसान प्रतिनिधि मंडल ह मुलाकात करिस। प्रतिनिधि मंडल ह जिला म शासन के कई ठन योजना मन के क्रियान्वयन के संबंध म जानकारी दीन। कृषक प्रतिनिधि मन ह सुराजी गांव योजना के नरवा, गरूवा, घुरवा, बाड़ी कार्यक्रम के माध्यम ले गांव म पशुपालन अउर जैविक खेती ल मिलत प्रोत्साहन बर मुख्यमंत्री श्री भूपेश बघेल के आभार जताइन।
ये बेरा म मोहला के जनपद सदस्य अउर प्रगतिशील कृषक श्री मोहरू कोमेटी ह मुख्यमंत्री ल बताइस कि उमन ग्राम रामगढ़ स्थित अपन ढाई एकड़ खेत म जैविक धान के खेती करे हें। जुलाई म उमन धान के रोपा लगाए रहिन। अभी धान के पौधा म शाखा फूटे लगे हे, फसल के स्थिति बहुत अच्छा हे, उत्पादन जादा होए के उम्मीद हे। उमन मुख्यमंत्री ल जैविक पद्धति ले धान के अपन खेती के मोबाइल वीडियो घलोक देखाइन। मुख्यमंत्री श्री भूपेश बघेल ह जनपद सदस्य श्री कोमेटी कोति ले रासायनिक खाद के उपयोग न करके सिरिफ जैविक खाद के उपयोग करके बेहतर खेती बर उंकर काम ल सहराइन अऊ एला अनुकरणीय कहिन। मुख्यमंत्री ह किसान प्रतिनिधि मन ल जैविक खेती बर किसान भाई मन ल प्रेरित अऊ प्रोत्साहित करे ल कहिन। श्री कोमेटी ह बताइस कि मोहला जनपद अध्यक्ष श्री लबलू राम चन्द्रवंशी ह घलोक ये पइत खेती म जैविक खाद के उपयोग करे हे। ये बेरा म छत्तीसगढ़ खनिज विकास निगम के अध्यक्ष श्री गिरीश देवांगन, केन्द्रीय जिला सहकारी बैंक रायपुर के अध्यक्ष श्री पंकज शर्मा अउर आन गणमान्य मनखे उपस्थित रहिन।