कोंडागांव जिला म घर पहुंच फिजियोथैरेपी सेवा : मुख्यमंत्री दाउ भूपेश बघेल के हुकुम म अंदरुनी गांव तक पहुंचत हे चिकित्सा सुविधा

रइपुर, 21 अगस्त 2021 शनिच्चर। लोकवा, जोड़ मन के दर्द, शारीरिक संतुलन के समस्या, गर्दन के जकड़न, लड़खड़ाहट जइसन अबड़ कन बीमारी मन म फिजियोथैरेपी अबड़े कारगर होथे। गंवइहा मन के धियान रखत कोंडागांव जिला प्रशासन ह फिजियोथैरेपी के सुविधा ल घरो-घर पहुंचाए बर ‘फिजियोथैरेपी तुमचो दुआर’ अभियान शुरू करे हावय। ये अभियान म अब तक 651 लोगन मन के उपचार करे जा चुके हे।
राज्य म गंवई क्षेत्र मन म चिकित्सा सुविधा म बढ़ोतरी बर अबड़ बन स्तर म कदम उठाए जावत हे। मुख्यमंत्री दाउ भूपेश बघेल ह विकासखंड से लेके जिला स्तर तक सबे सरकारी अस्पताल मन ल सर्वसुविधायुक्त बनाए के हुकुम देहे हवय। जेकर अनुरूप अब विकासखंड स्तर तक विशेषज्ञ चिकित्सक मन के नियुक्ति अउ आवश्यक उपकरण मन के बेवस्था होगे हे। फिजियोथैरेपी तुमचो दुआर अभियान के तहत गंवई क्षेत्र म शिविर लगाके मरीज मन के जांच अउ उन्कर उपचार करे जावत हे। ये अभियान के अंतर्गत लोकवा, जोड़ मन के दर्द, बैलेंसिंग के समस्या, कपंकपी, लड़खड़ाहट, चले फिरे म असमर्थता, श्वास के समस्या (दमा), शरीर के कोनो भाग म झुनझुनाहट या शून्यपन, गर्दन के जकड़न, पार्किंसन, अस्थिबाधा, मांसपेशी मन के दर्द, हड्डी मन के दर्द, जइसन विलक्षण रोग ले पीड़ित लोगन ल उपचार के घर पहुंच सेवा देहे जावत हे।
येकर शुभारंभ मुख्यमंत्री भूपेश बघेल कोति ले 27 जनवरी के कोंगेरा के आमसभा म ‘फिजियोथैरेपी तुमचो दुआर‘ के वाहन ल हरियर झण्डी दिखाके करे गे रिहिसे। राज्य म फिजियोथैरेपी सुविधा के मुहिम चलइया कोंडागांव पहला जिला हरे। अब तक जिला के गांव मन म 23 ठिन शिविर मन के आयोजन करे जा चुके हवय।।