सक्षम योजना बनिस महिला सशक्तिकरण के रद्दा: दतिमा गांव के नफीसा खातून ल ससुरार वाले मन निकाल देहे रहिन अब वो करत हे कपड़ा के व्यवसाय

सूरजपुर, 26 अगस्त 2021। कोरोना महामारी के सेती अइसे कतकोन घर हे जिहां काखरो ना काखरो मौत हो गए। कई महिला मन ह अपन पति ल गवां के खुद ल बेसहारा पाइन। अइसन कठिन समय म शासन के लाभकारी योजना वरदान असन उंकर काम आइस। जेखर से आज पीड़ित परिवार ल संबल मिलत हे। सूरजपुर म कलेक्टर डॉ. गौरव कुमार सिंह के हुकुम, सीईओ जिला पंचायत राहुल देव के बताए रद्दा अऊ जिला कार्यक्रम अधिकारी चंद्रबेश सिंह सिसोदिया के सियानी म महिला अऊ बाल विकास विभाग कोति ले अइसे जम्‍मो पीड़ित परिवार के सर्वे कराके कई ठन योजना मन के माध्यम ले लाभान्वित करे बर खेज-बीन करे गीस। जेमे अपन पति ल कोरोना महामारी म गंवा डरे उंखर पत्नि मन ल आर्थिक रूप ले सशक्त बनाए बर सक्षम योजना के लाभ बताके ऋण राशि देहे जात हे। जेमे 20 हजार ले 1 लाख तक के ऋण राशि देहे जाथे।
इही कड़ी म गांव दतिमा विकासखंड सूरजपुर के निवासी नफीसा खातून ह बताईस के कोरोना महामारी के सेती वोखर पति सिवतैन रजा के मृत्यु हो गीस। जेन बिजली मिस्त्री के काम करत रहिस। पति के मृत्यु के बाद घर वाले मन ह घलोक बेसहारा ल प्रताड़ित करना शुरू कर दीन अऊ नफीसा ल ओखर 4 साल के लइका समेत घर ले निकाल दीन। अइसन उलटा समय म महिला अऊ बाल विकास विभाग के टीम सर्वे बर नफीसा खातून तीर पहुंचीस अऊ ओ ल ढांढस बंधात सक्षम योजना के लाभ बताइस। वोकर सहमति के बाद तुरंत फार्म भरके योजना के अंतर्गत कलेक्टर के हाथ 1 लाख रूपिया के ऋण राशि नफीसा खातून ल देहे गीस। एखर संगेच लइका ल महतारी दुलार योजना के अंतर्गत निःशुल्क शिक्षा देहे बर आवेदन पत्र भराए गीस अऊ नफीसा खातून ल न्याय देवाए बर घलोक विभाग कोति ले ससुराल पक्ष उपर घरेलू हिंसा के मामला दर्ज कराए गीस। अभी हाल म सक्षम योजना के राशि ले नफीसा खातून अपन छोटे भाई के सहयोग ले हाट बाजार मन म कपड़ा के व्यवसाय करत हे, जेखर से एके महिना म ही 16 हजार तक के लाभ कमाए हे। ओ ह अपन आर्थिक सशक्तिकरण बर जिला प्रशासन अऊ राज्य शासन ल धन्यवाद ज्ञापित करे हे।