टेमरूगांव तक पहुंच मार्ग बने ले गांव वाले मन ल मिलीस सहुलियत
दू पहाड़ ल काटके बनाय गए हे सड़क
सड़क निर्माण ले बुनियादी सुविधा मिले म सरकार उपर मनखे मन के बाढिस विश्वास
नारायणपुर, मुख्यमंत्री श्री भूपेश बघेल के सियानी म राज्य सरकार कोति ले अधोसंरचना विकास के काम सरलग करे जात हे। छत्तीसगढ़ के दूरस्थ वनांचल नारायणपुर जिला मुख्यालय ले नक्सल प्रभावित ईलाका कोति जावन, त 50 किलोमीटर दूर पहाड़ मन ले घिरे टेमरूगांव ग्राम पंचायत आप मन के स्वागत करत हे ये बोर्ड दिखही। पहाड़ ले घिरे पंचायत म 2 गाँव के 6 पारा-टोला हे। इहां करीबन 200 परिवार रहिथे। ईलाका के प्राकृतिक सुंदरता आप मन ल जइसे बांधेच लेही, फेर ये सुंदरता बाहिर ले गये मनखे मन ल ही देखे म बने लागथे। पहाड़ के तराई म बसे गांव मन म रहइया मनखे बहुत कठिन परिस्थिति मन म जीवन गुजारथें। पहुंच मार्ग के अभाव म कोनो गांव के विकास के बात करना सिरिफ कोरी कल्पना जइसे हे, फेर प्रशासन के प्रयास ले ये जरूरी सुविधा मन अब पहुंचे लगे हे। नक्सल प्रभावित सुदूर वनांचल के निवासी जेन कई बछर ले सड़क के समस्या ले जूझत रहिन। ओ मन ल जिला प्रशासन ह कन्हारगांव ले टेमरूगांव 8 किलोमीटर अऊ टेमरूगांव ले तोयमेटा तक 7 किलोमीटर पक्की सड़क के सौगात देहे हे।
टेमरूगांव जेन करीबन ऊंची पहाड़ी म बसे हे। पहुँच मार्ग निर्माण करे म प्रधानमंत्री ग्राम सड़क योजना विभाग ल बहुत मेहनत करना परे हे काबर के पहाड़ के चट्टान ल काटके सड़क के निर्माण करे गए। मनखे मन के दिक्कत अऊ आवागमन के सुविधा बर प्रशासन ह पहाड़ ल काटके सड़क बनाए के दुरूह काम कर देखाए हे। पहिली जिहां गांव म पहुंचे बर पैदल चलना मुश्किल रहिस, अब उहां सड़क हे, बिजली हे, उचित मूल्य के दुकान, साफ पीए के पानी हे, स्कूल हे अऊ स्कूल म शिक्षक हे। फेर कुछ साल पहिली तक ये सब बुनियादी सुविधा इहां के मनखे मन बर सपना रहिस। स्वास्थ्य विभाग के टीम के संगें-संग एम्बुलेंस अऊ आन बुनियादी सुविधा मन अब गांव मन तक पहुंचत हे। सड़क बन जाय ले गांव वाले मन ल अब शिक्षा, स्वास्थ्य, आवागमन अऊ खाद्यान्न के बुनियादी सुविधा मिले लगे हे। जेखर से सरकार के प्रति मनखे मन के विश्वास बाढ़े हे।
