पक्का घर मिले ले जिला के 441 हितग्राही मन के सपना होइस पूरा
नारायणपुर, मनुष्य के मूलभूत जरूरत मन म रोटी, कपड़ा अऊ मकान ल गिने जाथे। हर मनखे के सपना होथे के ओखर खुद के एक सर्व सुविधा वाला मकान होवय, फेर कई परिस्थिति मन के सेती बहुत अकन मनखे खुद के मकान नइ बना पावयं या ओ मन ल बनाए म परेशानी के सामना करना परथे। रोटी, कपड़ा अऊ मकान हरेक मनखे के सबले जरूरी जरूरत माने जाथे। आज के समय म गरीब आदमी मेहनत मसक्कत के संग रोटी अऊ कपड़ा के व्यवस्था तो कर लेथे फेर मकान के व्यवस्था कर पाना कठिन होथे। अइसन मनखे मन ल शासन-प्रशासन ले सहयोग के उम्मीद होथे। मुख्यमंत्री श्री भूपेश बघेल के सियानी म प्रदेश के संगे-संग जिला के प्रशासनिक टीम घलोक मनखे मन के ए उम्मीद मन ल पूरा करे बर समर्पित होके काम करत हे।
मुख्यमंत्री श्री भूपेश बघेल के मंशा हे के प्रदेश के हर मनखे सुखी होवय, संपन्न होवय, ओला कोनो प्रकार के परेशानी झन होवय। मनखे मन के घर के समस्या ल लेके ओ मन संवेदनशीलता के संग काम करत हें। राज्य शासन के निर्देशानुसार कलेक्टर श्री पी एस एल्मा के निर्देशन अऊ मुख्य नगर पालिका अधिकारी, नगर पालिका नारायणपुर के मार्गदर्शन म जिला म आवासहीन मन के घर लउहे बनाये जात हे। एकरे परिणाम हे के नगर पालिका क्षेत्र नारायणपुर के अंतर्गत 543 स्वीकृत मकान म ले 441 हितग्राही मन ल पक्का मकान उपलब्ध करवाए गए हे। सरकार ह गरीब मन के ये समस्या ल बने सहिन समझे हे अऊ मनखे मन ल पक्का मकान के व्यवस्था करे के काम करत हे। मोर जमीन मोर मकान योजनांतर्गत जिंकर तिर पक्का मकान नइ ओ मन ल पक्का मकान उपलब्ध करावत हे।
नारायणपुर नगर पालिका क्षेत्र के महावीर चौक वार्ड नंबर 8 म रहइया श्रीमती इतवारिन बाई के सपना रहिस के ओखर पक्का मकान होवय। मोर जमीन मोर मकान अंतर्गत श्रीमती इतवारिन के पक्का मकान के सपना पूरा हो गीस। जानबा हे के शहर क्षेत्र मन के परिवार ल पक्का आवास उपलब्ध कराए के उद्देष्य ले मोर जमीन-मोर मकान योजना लागू करे गए हे। ये योजना के लक्ष्य शहरी क्षेत्र म रहइया कमजोर आय वर्ग अऊ आवासहीन परिवार ल मूलभूत सुविधा संग पक्का घर उपलब्ध कराए जाए। प्रदेश म ये योजना सबो नगरीय निकाय मन म क्रियान्वित हे। ये योजना के तहत् हितग्राही मन ल सरकार कोति ले दू लाख 28 हजार रूपिया तक अंशदान देहे जाथे। जेमां हितग्राही अपन सुविधानुसार अऊ राशि लगाके अपन पक्का मकान के निर्माण करा सकत हें।
