- गोबर ले बिजली उत्पादन अऊ छत्तीसगढ़ मिशन मिलेट बर मुख्यमंत्री श्री बघेल के पहल ल तको सहराइन
- प्रधानमंत्री ह रायपुर म नेशनल इंस्टीट्यूट बायोटेक स्ट्रेस मैनेजमेंट के नवा परिसर के करिन लोकार्पण
रायपुर, प्रधानमंत्री श्री नरेन्द्र मोदी ह आज रायपुर म नेशनल इंस्टीट्यूट बायोटेक स्ट्रेस मैनेजमेंट के नवा परिसर के लोकार्पण वीडियो कॉफ्रेंस के माध्यम ले करिन। ए बेरा म उमन जलवायु बदले के प्रभाव मन ले फसल ल बचाय अउ लाभकारी खेती बर छत्तीसगढ़ के उदीम ल सहराइन।
प्रधानमंत्री ह छत्तीसगढ़ राज्य म सुराजी गांव योजना के तहत गांव म बने गौठान मन म गोधन न्याय योजना के तहत गोबर के खरीदी अऊ ओखर से जैविक खाद के संगे-संग अब बिजली उत्पादन के राज्य सरकार के योजना ल घलोक सहराइन। प्रधानमंत्री श्री मोदी ह कहिन कि ए बेरा म हमला किसान मन ल फसल आधारित लाभ ले बाहिर निकाल के वेल्यू एडिशन कोती ले जाय के जरूरत हे। उमन मौसम के स्थानीय परिस्थिति के मुताबिक फसल उत्पादन ल बढ़ावा देहे ऊपर जोर दीन। छत्तीसगढ़ राज्य म लघु धान्य फसल (मिलेट्स) मन ल बढ़ावा देहे बर छत्तीसगढ़ सरकार कोती ले शुरू करे गए मिशन मिलेट ल उमन समय के जरूरत कहिन। प्रधानमंत्री श्री मोदी ह ए मौका म विशेष गुण वाले 35 फसल मन के किस्म घलोक राष्ट्र ल समर्पित करिन।
मुख्यमंत्री श्री भूपेश बघेल ह नेशनल इंस्टीट्यूट बायोटेक स्ट्रेस मैनेजमेंट के नवा परिसर के लोकार्पण अवसर म अपन निवास कार्यालय ले वीडियो कॉनफ़्रेंसिंग के संग सामिल होइन। श्री बघेल ह प्रधानमंत्री श्री नरेन्द्र मोदी संग सबो मनखे मन के अभिनंदन करत कहिन कि जलवायु सहिष्णुता तकनीकी अउ पद्धति मन के प्रचार-प्रसार बर भारत सरकार कोती ले शुरू करे जात जागरूकता अभियान म छत्तीसगढ़ के बड़का भागीदारी होही। मुख्यमंत्री ह ए मौका म जलवायु बदलाव के चुनौती मन के विस्तार ले उल्लेख करिन। उमन कहिन कि छत्तीसगढ़ म जलवायु बदले के प्रभाव मन ल कम करे बर कई कदम उठाए गए हे। नरवा, गरवा, घुरूवा, बाड़ी के माध्यम ले प्राकृतिक संसाधन मन ल संरक्षण अउ स्थानीय संसाधन मन के बेहतर उपयोग ले ग्रामीण अर्थव्यवस्था ल बेहतर बनाए के प्रयास करे जात हे। गोधन न्याय योजना अऊ राजीव गांधी किसान न्याय योजना ले खेती-किसानी ल समृद्ध बनाए के पहल करे गए हे। राज्य म गोधन न्याय योजना के तहत गौठान मन म गोबर के खरीदी करके ओखर से जैविक खाद के उत्पादन करे जात हे। मुख्यमंत्री ह कहिन कि अब गोबर ले बिजली उत्पादन के शुरूआत 2 अकटूबर ले करे जा जाही। मुख्यमंत्री निवास कार्यालय म कृषि मंत्री श्री रविन्द्र चौबे, मुख्यमंत्री के सलाहकार श्री प्रदीप शर्मा, मुख्यमंत्री के अपर मुख्य सचिव श्री सुब्रत साहू, कृषि उत्पादन आयुक्त डॉ.कमलप्रीत सिंह संग आन अधिकारी उपस्थित रहिन।
