वर्मी अऊ सुपर कम्पोस्ट बना के समूह के महिला मन होवत हें आत्मनिर्भर
लाभांश के राशि 29 लाख 33 हजार रूपिया स्व-सहायता समूह मन के खाता म हस्तांतरित करे गीस
गरियाबंद, छत्तीसगढ़ म अजा-बबा के बेरा ले ही गाय अऊ गोबर ल लछमी अऊ धन के संज्ञा देहे गए हे। एक कोति गाय ले जिहां दूध मिलथे, उहें दुसर कोति गोबर ले घर-आंगन ल लीपके स्वच्छ बनाए जाथे। छत्तीसगढ़ी संस्कृति म कोनो पुण्य काम बिना गोबर के उपयोग ले पूरा नइ होवय। आज इही गोबर न केवल स्वच्छता बर काम आवत हे, भलुक अब गोबर ले धन घलोक बरसे लगे हे।
मुख्यमंत्री श्री भूपेश बघेल के महती योजना गोधन न्याय योजना अब महिला मन बर आय के जरिया साबित होवत हे। गोधन न्याय योजना के तहत गोबर खरीद के उही गोबर ले महिला स्व सहायता के समूह के महिला मन वर्मी कंपोस्ट अऊ सुपर कम्पोस्ट बनाके तियार करत हें। जेखर से ओ मन आत्मनिर्भरता कोति अग्रसर होवत हें। जिला के मालगांव ले लेके ओडिशा सीमा ले लगे देवभोग ब्लॉक के गौठान मन म महिला मन गोबर ले वर्मी कंपोस्ट खाद बना के अब ओला समिति मन म बेचे लगे हे।
गोधन न्याय योजनांतर्गत जिला म कुल 123 सक्रिय गौठान मन म गोबर खरीदी के काम करे जात हे। योजना के चालू होए ले आज दिनांक तक 2 करोड़ 50 लाख रूपिया के कुल 1 लाख 25 हजार 217 क्विंटल गोबर खरीदी करे गए हे। खरीदे गये गोबर ले 15 हजार 707 क्विंटल वर्मी कम्पोस्ट के उत्पादन करे गए हे। जेमां राशि 89.71 लाख रूपिया के 89 हजार 71 क्विंटल वर्मी कम्पोस्ट विक्रय करे गए हे। अइसनहे 9312.15 क्विंटल सुपर कम्पोस्ट के उत्पादन करे गीस, जेमां 30 हजार 29 क्विंटल लागत राशि 19.25 लाख रूपिया के विक्रय करे गए हे। लाभांश के राशि करीबन 29 लाख 33 हजार रूपिया स्व-सहायता समूह मन के खाता म हस्तांतरित करे गए हे।
वर्मी कम्पोस्ट निर्माण ले जुड़े महिला मन ह कहिन कि ओ मन ये योजना के लाभ लेवत हें अऊ ये योजना ऊंखर खातिर आर्थिक आय के जरिया साबित होवत हे। कभू रोजगार बर एतेी-वोती भटकइया गरीब महिला मन ल अब स्थानीय स्तर म ही रोजगार मिले लगे हे। महिला मन अब खुद के पैर म खड़े होके वर्मी कम्पोस्ट खाद तियार करे म जुट गए हें। आर्थिक रूप ले वो मन मजबूत होवत हें। संगेच ओ मन ल रोजगार के एक सुनहरा अवसर मिलत हे। गौठानों म खरीदे गये गोबर ले बड़का मात्रा म वर्मी कंपोस्ट खाद बनाए के काम महिला मन मिलके करत हें। प्रदेश के मुख्यमंत्री श्री भूपेश सरकार के गोधन न्याय योजना आगू चलके अऊ जादा मजबूत होवय एखर बर महिला मन गोबर ले अगरबत्ती अऊ आन पूजन सामान घलोक बनावत हें। स्व सहायता समूह के महिला मन ह बताइन कि बिहान योजना के महिला मन ये योजना ल एक आय के स्रोत बनाके अपन जीविकोपार्जन करत हें।
