बिलासपुर। देशभर के बिजी कम्पनी मन म चलत कोइला संकट के बीच केंद्रीय कोयला मंत्री प्रल्हाद जोशी आज कोरबा आवत हें। जानबा हे के उमन बुधवार भिनसरहा नौ बजे दिल्ली ले विशेष विमान ले रवाना होके 11 बजे बिलासपुर पहुंचहीं। एखर बाद 11:15 बजे हेलिकॉप्टर ले सीधा गेवरा हेलीपैड पहुंचहीं। 11:30 बजे ले साउथ इस्टर्न कोलफील्ड लिमिटेड (एसईसीएल) के मेगा प्रोजेक्ट दीपका, गेवरा व कुसमुंडा खदान के दौरा करहीं। ये बेरा म मंत्री जोशी कोयला उत्पादन अऊ डिस्पैच बढ़ाए म अधिकारी मन के संग मंथन करहीं। ऊंखर संग कोल इंडिया के चेयरमैन प्रमोद अग्रवाल घलोक मौजूद ररइहीं।
आप मन जानतेच हव के दू महिना पहिली कोल इंडिया के चेयरमैन प्रमोद अग्रवाल ह गेवरा खदान के दौरा करके अधिकारी मन के बैठक लेहे रहिन। एखर अलावा कोयला मंत्रालय के संयुक्त सचिव विस्मिता अऊ निर्देशक तकनीक विनय रंजन घलोक खदान के दौरा करे रहिन। देशभर के थर्मल पॉवर स्टेशन मन म कोइले के कमी अऊ व्यापक बिजली कटौती के आशंका मन के चलते केंद्र सरकार ह सरलग बिजली के जरूरत ल पूरा करे बर जबर मात्रा म कोईला देहे के भरोसा देवाए हे। कोईला मंत्री प्रहलाद जोशी ह कहे हें के कोल इंडिया तीर फिलहाल 22 दिन के कोयला स्टॉक म हे अऊ आपूर्ति बढ़ाए जात हे।
छत्तीसगढ़ के कोरा ले जादा-ले-जादा मात्रा म कोईला खोद के पूरा देश म भेजे के योजना बर ये साहेब मन घेरी-बेरी छत्तीसगढ़ के दौरा करत हें।
छत्तीसगढ़ के अंचरा के कोइला खोद के पूरा देश म बगराहीं अंजोर: आज आवत हें कोईला मंत्री, लगाहीं जोर
