जशपुर, मनरेगा कार्यक्रम ले मनखे मन ल लाभ पहुंचाए बर मेट के माध्यम ले प्रचार प्रसार करे जात हे। मेट मन अपन ग्राम पंचायत म अपन काम ल बने सहिन निभावत हें, जेखर से गांव के जम्मो मनखे मन ल रोजगार तो मिलतेच हे संगेच गांव के मजदूर मन ल अकतहा सुविधा घलोक उपलब्ध कराए जात हे। गांव म डबरी, कुंआ निर्माण संग कई काम मन ल गांव वाले मन बर सुलभ बनके गांव ल समृद्ध बनाए म ये मन अपन अहम भूमिका अदा करत हें।
इही कड़ी म जशपुर जिला के पत्थलगांव विकासखंड के ग्राम सुरजगढ़ के पुष्पावती चौहान ह अपन ग्राम पंचायत म विकास ल बढ़ावा देवत न सिरिफ गांव के मनखे मन ल मनरेगा के तहत् रोजागर उपलब्ध करावत हे भलुक अपन गांव म कई ठन योजना ले मनखे मन ल लाभ प्रदान करे म उंखर सहायता घलोक करत हे। पुष्पावती के बताती गांव म अपन प्रारंभिक पढ़ाई पूरा करे के बाद वोखर पास कोनो रोजगार नइ रहिस। परिवार के आर्थिक स्थिति बने नइ रहिस फेर ओ ल मनरेगा कार्यक्रम म मेट बने के अवसर मिले ले ओ ल रोजगार तो मिलीस, संगेच अपन क्षे़त्र म सुविधा उपलब्ध कराए के मौका घलोक मिलीस। 02 अकटूबर 2016 के ग्राम सभा म मेट नियुक्ति करे गीस। मेट बने के बाद वोखर आर्थिक स्थिति घलोक बने हो गे, संगे-संग वो ह अपन पढ़ई घलोक करत रहिस।
पुष्पा ह मेट के रूप म कई कमजोर परिवार के सहयोग करके उमन ल मनरेगा के तहत रोजगार तको देवइस। पुष्पावती ह मेट बने के बाद अपन मजदूर मन ल कार्यस्थल म सुविधा उपलब्ध कराए के दृष्टि ले पीए के पानी अउ शेड के घलोक व्यवस्था कराईस जेखर से मजदूर मन ल मध्यान्ह भोजन के समय म पेयजल अउ छाव के सुविधा मिल सकय। संगेच वो ह कार्यस्थल म चिकित्सा सुविधा बर मेडिकल किट घलोक रखवाइस। जेखर से काम के समय तात्कालिक उपचार के सुविधा मजदूर मन ल प्राप्त हो सके। वो ह महिला मन ल रोजगार ले जोड़े बर विशेष प्रयास करिस। महिला मन ल जागरूक करे बर घर-घर जाके ओ मन ल समझाईश देहे के संग स्व-सहायता समूह ल घलोक सामिल करिस। जेखर से महिला मन म रोजागर के प्रति आकर्षण बाढि़स। जेखर से अब स्व-सहायता समूह के महिला मन के घलोक आर्थिक स्थिति बनेच हो गए हे।
मनरेगा मेट पुष्पावती चौहान रोजगार के बगरावत हे अंजोर
