साल 2020-21 म 5.90 प्रतिशत जादा राजस्व सकलाईस
रायपुर, छत्तीसगढ़ के पंजीयन विभाग कोति ले अचल सम्पत्ति के अंतरण विलेख मन के पंजीयन ले स्टाम्प शुल्क अऊ पंजीयन फीस के रूप म वित्तीय साल 2020-21 म 1589.42 करोड़ राजस्व प्राप्त होए हे, जेन ह लक्ष्य 1500 करोड़ रूपिया ले 5.90 प्रतिशत जादा हे।
चालू वित्तीय साल 2021-22 बर वित्त विभाग कोति ले निरधारित राजस्व प्राप्ति के लक्ष्य 1650 करोड़ रूपिया हे। अब तक 714.57 करोड़ रूपिया राजस्व सकला गए हे, जेन पउर साल के इही बेरा के राजस्व प्राप्ति 496.58 करोड़ रूपिया के तुलना म 44 प्रतिशत जादा हे। छत्तीसगढ़ शासन कोति ले जनवरी 2019 म आम मनखे मन के सुविधा ल ध्यान म रखत छोटे भू-खण्ड मन के विक्रय म लगे रोक ल हटाके ई-पंजीयन प्रणाली म जरूरी प्रावधान कराए गए रहिस। जनवरी 2019 ले अब तक छोटे भू-खण्ड मन ले संबंधित 3 लाख ले जादा कागद मन के पंजीयन होए हे।
राज्य शासन कोति ले कागद मन के बाजार मूल्य निर्धारण करइया गाईडलाईन के दर म 30 प्रतिशत के कमी 25 जुलाई 2019 ले करे गए रहिस। कई परिस्थिति मन ल ध्यान म रखत शासन कोति ले ओ 30 प्रतिशत के कमी ल साल 2020-21 अऊ साल 2021-22 बर घलोक यथावत रखे गए हे। सम्पत्ति के बाजार मूल्य म कमी के संगेच सम्पत्ति के खरीदी बिक्री म राहत मिले ले समाज के सबो वर्ग बर जमीन, मकान खरीदना आसान होए हे। अइसनहे आवासीय भवन के पंजीयन म 2 प्रतिशत के रियायत देहे गए हे। शासन कोति ले 75 लाख रूपिया कीमत तक के मकान अऊ भवन के विक्रय संबंधी विलेख मन म प्राभार्य होवइया पंजीयन शुल्क के दर म दू प्रतिशत के रियायत अगस्त 2019 ले देहे जात हे, जेन ल नागरिक मन के हित ल ध्यान म रखत वित्तीय साल 2020-21 अऊ 2021-22 बर पंजीयन शुल्क के रियायत ल यथावत रखे गए हे।
जमीन खरीदी बिक्री बर देहे गए रियायत मन ले छोटे अऊ मध्यम परिवार के अपन मकान खरीदे के सपना पूरा होवत हे। राज्य शासन कोति ले जमीन के क्रय-विक्रय अऊ मकान अऊ फ्लेट म देहे जात पंजीयन म छूट ले मकान अऊ जमीन खरीदी बर कम कीमत देना परत हे।
