उतेरा फसल क्लस्टर लेहे बर होही जोर, गौठान मन म तेल पेरे के यूनिट लगाए जाही

-बरसा के बाद नमी वाले मिट्टी म लहे जाथे उतेरा के फसल, किसान मन ल प्रेरित करे कार्ययोजना बनाके काम करे बर कलेक्टर ह दीन हुकुम
दुर्ग, छत्तीसगढ़ म पारंपरिक रूप ले उतेरा या ओन्हारी फसल तको लेहे जाथे फेर धीरे-धीरे एकर चलन कम हो गए हे। खेती-किसानी ल बढ़ावा देहे बर सरकार ह ये पईत उतेरा फसल मन उपर विशेष फोकस करे के हुकुम देहे हे। एमा शासन ह क्लस्टर बनाके किसान मन ल उतेरा फसल मन दलहन तिलहन के फसल लेहे बर प्रेरित करही। क्लस्टर म गौठान म तेल निकाले के यूनिट लगाए जाही। किसान मन ल उतेरा फसल म अच्छा लाभ होवय, एखर घलोक ठोस रणनीति बनाए गए हे। समीक्षा बैठक म कलेक्टर डॉ. सर्वेश्वर नरेंद्र भुरे ह येकर बारे म विस्तार ले चर्चा करिन। बैठक म अपर कलेक्टर सुश्री नूपुर राशि पन्ना, जिला पंचायत सीईओ श्री सच्चिदानंद आलोक, भिलाई निगम आयुक्त श्री प्रकाश सर्वे संग आन अधिकारी उपस्थित रहिन।