बालोद, जिला म एक मेडम के हत्या के मामला म पुलिस ह देवारी के संझा कन खुलासा करे हे। पुलिस के कहना हे के डौण्डीलोहारा थाना क्षेत्र के गांव के शिक्षिका के हत्या अऊ गैंगरेप के बाद कर देहे गए रहिस। सामूहिक दुष्कर्म के वारदात ल अंजाम मेडम के प्रेमी ह अपन संगी मन के संग मिलकर दे रहिस। दुष्कर्म के समय मेडम ह चिल्लईस त आरोपी मन ह ओखर मुंह ल दबा देहे रहिन, जेखर सेती वो मेडम के मौत हो गे। हत्या के ये वारदात के खुलासा पुलिस ह 4 महिना बाद करे हे। पुलिस ह मामला म 3 आरोपी मन ल गिरफ्तार करे हे।
बालोद के एसपी सदानंद कुमार के बताती बीते 12 जून के कोसमी गांव, थाना डौण्डीलोहारा निवासी महिला के लास ओखर घर के अंदर परछी म अर्ध्दनग्न अवस्था म मिले रहिस। बालोद पुलिस डॉग स्क्वाड अऊ एफएसएल वैज्ञानिक अधिकारी ले घटनास्थल के मुआयना करवाए रहिस। सबो दल के आए के बाद घटनास्थल के बारीकी ले जांच करे गीस। एके नजर म घटनास्थल निरीक्षण, शव निरीक्षण ले मामला दुष्कर्म अऊ हत्या के प्रतीत होइस। एखर बाद डौण्डी लोहारा थाना म मर्ग नंबर 31/2021 धारा 174 जा.फौ. कायम करके जांच शुरू करे गीस। पुलिस अधीक्षक सदानंद कुमार ह बताइस के जांच म पता चलिस कि ग्राम कोसमी निवासी कमल नारायण साहू के मृतिका के संग पाछू 10 – 12 बछर ले प्रेम संबंध रहिस। कमल नारायण साहू घलोक ये बताइस के मृतिका के संग ओखर नाजायज संबंध रहिस। कोसमी के उत्तम कुमार रावटे अऊ कमलेश श्रीवास उपर घलोक शंका के सुई घूमत रहिस, काबर के गांव वाले अऊ गवाह कले-चुप ये घलोक कहत रहिन के घटना के दिन ये दुनों मन मृतिका के घर के आस-पास देखे गए हें।
पुलिस अधीक्षक सदानंद कुमार ह बताइस कि बीते 28 सितंबर के तीनों संदेही के डीएनए परिक्षण बर रक्त नमूना (सैम्पल) लेके विधि सम्मत कार्यवाही करत राज्य न्यायालयिक विज्ञान प्रयोगशाला रायपुर भेजे गीस। 3 नवंबर के तीनों संदेही मन के परीक्षण रिपोट मिलिस, जेखर से ये पक्का हो गे के तीनों संदेही मन एक राय होके मृतिका के संग बलात्कार करके हत्या करे हें। आरोपी मन ह घलोक अपन जुर्म कबूल कर लेहे हें। आरोपी मन ह बताइन के उमन शिक्षिका के संग सामूहिक दुष्कर्म करिन अऊ ओखर बाद हत्या कर दीन।
4 महिना पहिली मेडम के हत्या के मामला म होइस खुलासा, 3 झन धरईन: पढ़व का हे मामला
