- रासायनिक खाद के कमी ले निपटे म मिलही मदद: स्वाईल हेल्थ होही बेहतर
- छत्तीसगढ़ देश के एक मात्र राज्य, जेन ह घोषित करिस कोदो-कुटकी, रागी के समर्थन मूल्य
- मनरेगा ल कृषि काम ले जोड़े के जरूरत: उत्पादन लागत होही कम
- बैठक म छत्तीसगढ़ के मिलेट मिशन अऊ वर्मी कम्पोस्ट उत्पादन कार्यक्रम के सराहना
- प्रदेश के 9 जिला अस्पताल मन म निःशुल्क कीमोथेरेपी अऊ 8 जिला अस्पताल मन म निःशुल्क डायलिसिस के सुविधा
- मुख्यमंत्री के अध्यक्षता म राज्य स्तरीय दिशा समिति के बैठक आयोजित
रायपुर, मुख्यमंत्री श्री भूपेश बघेल ह कहे हें कि राष्ट्रीय स्तर म जैविक खाद अऊ वर्मी कम्पोस्ट के उत्पादन ल बढ़ावा देहे अऊ जैविक खेती के दिशा म आगू बढ़े के जरूरत हे। उमन कहिन कि एखर से छत्तीसगढ़ के संग देश के आन राज्य मन म घलोक रासायनिक खाद के कमी के समस्या ले निपटे म मदद मिलही, संगेच स्वाईल हेल्थ बढि़या होही अऊ अच्छा गुणवत्ता के कृषि उपज मिलही। उमन कहिन कि कोविड-19 के कारण रासायनिक खाद मन बर कच्चा माल के आपूर्ति म कठिनाई होवत हे, ते खातिर रासायनिक खाद के भरपूर आपूर्ति नइ हो पावत हे। मुख्यमंत्री आज इहां न्यू सर्किट हाउस म केन्द्र सरकार के कई ठन योजना मन के प्रगति के समीक्षा, निगरानी, मूल्यांकन अऊ केन्द्र अऊ राज्य के मध्य बेहतर समन्वय बर आयोजित राज्य स्तरीय दिशा समिति (डेव्लपमेंट कोऑर्डिनेशन एंड मॉनिटरिंग कमेटी) के बैठक ल सम्बोधित करत रहिन।
