राज्य के 61 निकाय मन ल घलोक मिलही पुरस्कार, छत्तीसगढ़ ले सबले जादा निकाय मन ल मिलही सम्मान
नई दिल्ली के विज्ञान भवन म आयोजित स्वच्छ अमृत महोत्सव म देहे जाही अवार्ड
छत्तीसगढ़ लगातार तीसर बार स्वच्छता म नम्बर वन: साल 2019 अउ 2020 म घलोक स्वच्छता के मामला म रहिस अग्रणी राज्य
रायपुर, मुख्यमंत्री श्री भूपेश बघेल आजादी के 75वां वर्षगांठ के मौका म मनाए जात आजादी के अमृत महोत्सव के अंतर्गत 20 नवंबर 2021 के नई दिल्ली के विज्ञान भवन म आयोजित स्वच्छ अमृत महोत्सव म राष्ट्रपति श्री रामनाथ कोविंद के हाथ छत्तीसगढ़ ल भारत के स्वच्छतम् राज्य मन के श्रेणी म देहे जाय वाला अवार्ड झोंकहीं।
छत्तीसगढ़ ह स्वच्छता के क्षेत्र म अपन परचम लहरात देश के स्वच्छ्तम राज्य के अपन दरजा ल बरकरार रखत सर्वश्रेष्ठ प्रदर्शन करे हे। छत्तीसगढ़ ल न सिरिफ राज्य के रूप म, भलुक इहां के 61 शहरी निकाय मन ल घलोक उत्कृष्ट प्रदर्शन बर पुरस्कृत करे जाही। छत्तीसगढ़ अइसन राज्य होही जेखर सबले जादा निकाय पुरस्कृत करे जात हे। स्वच्छता के मामला म छत्तीसगढ साल 2019 अउ 2020 म घलोक अग्रणी राज्य रहे हे।
जानबा हे कि भारत सरकार के आवासन अउ शहरी कार्य मंत्रालय कोति ले हर साल देश के जम्मो शहर अउ राज्य मन के बीच स्वच्छ सर्वेक्षण के आयोजन करे जात हे। ये मां कई ठन मापदंड के अंतर्गत शहरी स्वच्छता के आंकलन करे जात हे। मुख्य रूप ले घर-घर ले कचरा सकेले के काम, कचरा के वैज्ञानिक रीति ले निपटान, खुला म शौच मुक्त शहर, कचरा मुक्त शहर आदि के थर्ड पार्टी के माध्यम ले आंकलन करत नागरिक मन के फीडबैक ल घलोक ये मां सामिल करे जाथे। इही आधार म राज्य अउ शहर मन के रैंकिंग जारी करके उत्कृष्ट प्रदर्शन करइया राज्य अऊ शहर मन ल पुरस्कृत करे जाथे।
छत्तीसगढ़ देश के अइसन एक मात्र प्रदेश हे जिहां नरवा, गरूवा, घुरवा अउ बाड़ी के सिद्धांत के मुताबिक 9000 ले जादा स्वच्छता दीदी मन घर-घर ले 1600 टन गीला अउ सूखा कचरा सकेल के वैज्ञानिक रीति ले कचरा के निपटान करथें। एखर अलावा भारत सरकार कोति ले छत्तीसगढ़ ल देश के पहिली ओडीएफ़ प्लस प्लस राज्य घोषित करे गए हे।
