दिल्ली, छत्तीसगढ़ ल स्वच्छ अमृत महोत्सव कार्यक्रम म सबले स्वच्छ राज्य श्रेणी म पुरस्कृत करे गए हे। छत्तीसगढ़ के मुख्यमंत्री श्री भूपेश बघेल ह नई दिल्ली के विज्ञान भवन म आयोजित कार्यक्रम म राष्ट्रपति श्री रामनाथ कोविंद के हाथ ये अवार्ड ल झोकिंन। ये सम्मान समारोह म प्रदेश के सबले जादा 67 नगरीय निकाय मन ल घलोक उत्कृष्ट प्रदर्शन बर कई श्रेणी मन म पुरस्कार देहे गए हे। कार्यक्रम म आवासन अऊ शहरी कार्य मंत्री हरदीप सिंह पुरी, राज्य मंत्री कौशल किशोर घलोक सामिल रहिन।
ये बेरा म छत्तीसगढ़ के मुख्यमंत्री श्री भूपेश बघेल ह कहिन कि छत्तीसगढ़ ह सरलग तीसर साल स्वच्छतम् राज्य के राष्ट्रीय पुरस्कार जीते हे त एकर श्रेय छत्तीसगढ़ के पौने तीन करोड़ मनखे मन ल जाथे। मैं विशेष रूप ले राज्य के महिला मन ल एकर श्रेय देना चाहहूं, जेमन शहर ले लेके गांव तक स्वच्छता के एक नवा संस्कृति के निर्माण करे हें।
जानबा हे कि भारत सरकार के आवासन अउ शहरी कार्यमंत्रालय कोति ले हर साल देश के जम्मो शहर अउ राज्य के बीच स्वच्छता सर्वेक्षण के आयोजन करथे। ये मां कई मापदंड के अंतर्गत शहरी स्वच्छता के आंकलन करे जाथे। मुख्य रूप ले घर-घर ले कचरा सकेलना, कचरा के वैज्ञानिक रीति ले निपटान, खुले म शौच मुक्त शहर, करचरा मुक्त शहर आदि के थर्ड पार्टी के माध्यम ले आंकलन करत नागरिक मन के फीडबैक ल घलोक ये मां सामिल करे जाथे। इही आधार म राज्य अउ शहर मन के रैंकिंग जारी करके उत्कृष्ट प्रदर्शन करइया राज्य अऊ शहर ल पुरस्कृत करे जाथे।
छत्तीसगढ़ देश के अइसन एक मात्र प्रदेश हे जिहां म नरवा, गरूवा, घुरवा अउ बाड़ी के सिद्धांत के मुताबिक 9000 ले जादा स्वच्छता दीदी मन घर-घर ले 1600 टन गीला अउ सूखा कचरा सकेल के वैज्ञानिक रीति ले कचरा के निपटान करथें। एखर अलावा भारत सरकार कोति ले छत्तीसगढ़ ल देश के पहिली ओडीएफ़ प्लस प्लस राज्य घोषित करे गए हे।
नई दिल्ली म पुरस्कार ग्रहण करे मुख्यमंत्री के संग शहरी विकास मंत्री श्री शिव कुमार डहरिया, अपर मुख्य सचिव श्री सुब्रत साहू, विभाग के सचिव अलरमेलमंगई डी, आवासीय आयुक्त सुश्री एम गीता, स्वच्छ भारत मिशन के डायरेक्टर श्री सौमिल रंजन चौबे आदि समारोह म उपस्थित रहिन।
छत्तीसगढ़ नम्बर वन: राज्य ल मिलीस देश के सबले स्वच्छतम राज्य के इनाम
