जैव विविधता संरक्षण अऊ जीविकोपार्जन के उद्देश्य ले किसान मन ल लाख के खेती ले जोड़े के कवायद शुरू
बलरामपुर, जिला म भारत सरकार के पर्यावरण वन अऊ जलवायु बदलाव मंत्रालय कोति ले संचालित भारतीय वानिकी अनुसंधान अऊ शिक्षा परिषद् कोति ले जिला म लाख के खेती ल वैज्ञानिक तरीका ले बढ़ावा देहे बर किसान मन ल मुफ्त लाख बीज के वितरण करे जात हे, जेन किसान मन के आर्थिक स्थिति सुधारे म सहायक सिद्ध होही।
ज़िला म रघुनाथनगर वन परिक्षेत्र अंतर्गत जंगल के तीर-तखार वाले गांव मन म लाख के खेती ल बढ़ावा देहे बर व जैव विविधता संरक्षण अऊ जीविकोपार्जन के उद्देश्य ले किसान मन ल लाख के खेती ले जोड़े के कवायद शुरू करे गए हे। किसान मन के आर्थिक स्थिति ल मजबूत करे बर उमन ल मुफ्त म लाख बीज के वितरण करके ओला लगाय के विधि के बारे म जानकारी देहे जात हे। जेखर से किसान अब अपन परंपरागत खेती ले होवत मुनाफा के संगें संग लाख के खेती करके अपन आय बढ़ा सकत हें। लाख के खेती बर पहिली किसान मन ल प्रशिक्षण देहे गए रहिस, जेखर बाद बीज वितरण करके ओला पलाश के पेड़ म बांधके लाख के खेती के तरीका बताए जात हे। लाख सूक्ष्म कीड़ा मन के सहायता ले करीब 8 ले 9 महीना म बनके तियार हो जाथे, जेन ल बेचके किसान मन ल आय होही। भारतीय वानिकी अनुसंधान के सामाजिक सलाहकार ह बताइस कि जिला म सात गांव ले करीब 1257 किसान मन के चयन लाख के खेती बर करे गए हे।
