हजारों के संख्या म सामिल होइन हर आयु वर्ग के धावक
मुख्यमंत्री ह रन फॉर सीजी प्राइड ल झंडी देखाईस
नवा छत्तीसगढ़ समता अऊ आर्थिक समानता के मॉडल: मुख्यमंत्री श्री भूपेश बघेल
रायपुर, राजधानी रायपुर म आज भिनसरहा आयोजित रन फॉर सीजी प्राइड ल लेके मनखे मन म अभूतपूर्व उत्साह दिखाई दीस। छत्तीसगढ़ के स्वाभिमान अऊ गर्व बर आयोजित ये दौड़ म हर आयु वर्ग के 20 हजार ले जादा धावक सामिल होइन। मुख्यमंत्री श्री भूपेश बघेल ह भिनसरहा 7 बजे गांधी उद्यान चौक ले झंडी देखाके रन फॉर सीजी प्राइड के शुभारंभ करिस। ये बेरा म गांधी उद्यान के पूरा क्षेत्र, मनखे मन के हुजूम ले खचाखच भरे रहिस। दौड़ म भाग लेहे बर पहुंचे स्कूली लइका मन ले लेके प्रदेशभर ले आए युवा धावक मन के समूह ये बेरा म भारत माता के जय, छत्तीसगढ़िया सबले बढ़िया के उद्घोष करे के संगेच मुख्यमंत्री श्री भूपेश बघेल जिंदाबाद के नारा लगावत रहिन। रन फॉर सीजी प्राइड के शुभारंभ बर मुख्यमंत्री श्री भूपेश बघेल जइसनहेच मंच म पहुंचिन उहां मौजूद जनसमूह ह मुख्यमंत्री भूपेश बघेल जिंदाबाद के नारा लगाय लगिन। एखर प्रति उत्तर म मुख्यमंत्री ह युवा मन म जोश भरत कहिन ‘कका अभी जिंदा हे‘। मुख्यमंत्री श्री भूपेश बघेल के ये प्रति उत्तर म जनसमूह ह ताली बजा बजाके उंखर जोरदार स्वागत करिस।
मुख्यमंत्री श्री भूपेश बघेल ह ये मौका म उपस्थित जनसमूह ल सम्बोधित करत कहिन कि हमन जेन नवा छत्तीसगढ़ गढ़े के संकल्प ले रहेन, ओला हम पूरा करे के दिशा म तेजी ले आगू बढ़त हन। तीन साल म ही छत्तीसगढ़ राज्य ह देश-दुनिया म अपन विशिष्ट पहिचान कायम करे हे। छत्तीसगढ़ मॉडल के चर्चा आज पूरा देश म हे। हमन विकास के छत्तीसगढ़ मॉडल ले गुजरात मॉडल ल काफी पीछू छोड़ देहे हन। छत्तीसगढ़ मॉडल समता अऊ आर्थिक समानता लाने वाला मॉडल ये। समाज के गरीब, किसान, आदिवासी, महिला, युवा अउर सबो वर्ग अऊ समुदाय के मनखे मन के बेहतरी बर काम करे जात हे। ये मां सबो समाज अउ वर्ग के मनखे सामिल हे। कोरोना संकट काल के समय घलोक छत्तीसगढ़ म विकास के काम सरलग जारी रहे हे।
रन फॉर सीजी प्राइड के शुभारंभ अवसर म मुख्यमंत्री श्री भूपेश बघेल, स्कूल शिक्षा मंत्री डॉ. प्रेमसायसिंह टेकाम, संसदीय सचिव श्री यू.डी. मिंज अउर सुश्री शुकंतला साहू, महापौर श्री एजाज ढेबर, गृह निर्माण मंडल के अध्यक्ष अउर विधायक श्री कुलदीप जुनेजा, विधायक श्री मोहन मरकाम अऊ आन जनप्रतिनिधि, जनसम्पर्क आयुक्त श्री दीपांशु काबरा, मुख्यमंत्री के विशेष सचिव डॉ. एस. भारतीदासन, उप पुलिस महानिरीक्षक श्री आरिफ शेख, संचालक खेल अउ युवा कल्याण श्रीमती श्वेता श्रीवास्तव सिन्हा, कलेक्टर रायपुर श्री सौरभ कुमार, वरिष्ठ पुलिस अधीक्षक श्री प्रशांत अग्रवाल, जनसम्पर्क संचालक श्री सौमिल रंजन चौबे संग आन अधिकारी, नागरिकगण उपस्थित रहिन।
