बलौदा बाजार, मौसम म होए एदुपहा बदलाव के सेती प्रदेश म शीतलहर के प्रकोप ले जाड़ अड़बड़ बाढ़ गए हे। जाड़ ले बांचे बर हर जगा अलाव जले लगे हे। अइसन म गौठान म बने गोकाष्ठ उपयोगी साबित होवत हे। ठंड के अचानक बढ़े ले बेसहारा, बेघर जरूरतमंद अऊ राहगीर मन ल दिक्कत ल देखते मुख्यमंत्री श्री भूपेश बघेल ह घलोक सबो जिला मन म जरूरी व्यवस्था के निर्देश देहे हें। ऊंखर निर्देश म रैनबसेरा, सार्वजनिक जगा अऊ आश्रय गृह मन म ठंड ले राहत बर अलाव के व्यवस्था करे गए हे। अइसन म बलौदाबाजार जिला म प्रमुख चौक चौराहा मन म अलाव के व्यवस्था बर ये पइत लकड़ी के जगा गौठान म बनाय गए गौकाष्ठ के उपयोग करे जात हे। ये गौकाष्ठ लकड़ी के अपेक्षा काफी किफायती होए के संगेच पर्यावरण के घलोक अनुकूल हे।
जानबा हे कि नगर पालिका परिषद बलौदाबाजार कोति ले राज्य आजीविका मिशन के सेंटर मन म दू गोठान मन के संचालन करे जात हे। इहां राज्य सरकार कोति ले संचालित गोधन न्याय योजना के तहत पशु पालक अऊ गांव वाले मन ले गोबर खरीदी करे जात हे। गौठान मन म गोबर खरीदी के काम श्री शनिदेव महिला स्व सहायता समूह कोति ले करे जात हे। समूह के अध्यक्ष श्रीमती सुभाषनी शेन्द्रे ह बताइस कि हमार समूह म करीबन 59 महिला जुड़े हें। सबो महिला मन डोर टू डोर कचरा सकेले के संग गोबर ले वर्मी कंपोस्ट, सुपर कंपोस्ट अउ गोकाष्ठ के निर्माण के काम करथें।
श्रीमती शेन्द्रे ह बताइस कि कोविड के दूसर लहर के समय मृतक मन के अंतिम संस्कार म घलोक गोकाष्ठ के उपयोग बड़ पैमाना म करे गीस। अभी हाल म समूह तीर करीबन 50 क्विंटल गो काष्ठ उपलब्ध हे, जेन ल ओ मन 8 रूपिया प्रति किलो के दर ले बेचत हें। अभी हाल के दिन म नगरीय निकाय बलौदाबाजार कोति ले ही शीतलहर ले बचाव अउ अलाव के व्यवस्था बर गोकाष्ठ ल खरीदे गए हे। एखर से ओ मन ल अकतहा आय होवत हे।
गौठान म बने गौकाष्ठ के अलाव ह बचावत हे जीवलेवा जाड़ ले
