प्रधानमंत्री सूक्ष्म खाद्य उन्नयन योजना अंतर्गत गरियाबंद जिला के चयन

गरियाबंद, प्रधानमंत्री सूक्ष्म खाद्य उन्नयन योजना-पी.एम.एफ.एम.ई अंतर्गत गरियाबंद जिला के चयन होए हे। भारत सरकार ह राज्य के एकमात्र गरियाबंद जिला म लघु वनोपज के उत्पादन अऊ संग्रहण ल देखत ए चयन करे गए हे। आज वन विभाग के ऑक्सन हॉल म ये संबंध म कार्यशाला के आयोजन करे गीस, जेमां योजना के आधारभूत जानकारी अउ लघु वनोपज के उत्पादन, प्रसंस्करण अउ मूल्य संवर्धन के संबंध म पावर पाइंट प्रस्तुतीकरण करे गीस।
कार्यशाला म कलेक्टर श्री निलेश क्षीरसागर ह बतौर मुख्य अतिथि कहिन कि जिला बर ये एक महत्वपूर्ण उपलब्धि हे। जिला म लघु वनोपज मन के संग्रहण अऊ गुणवत्ता ल देखत ये जिला के चयन करे गए हे। उमन कहिन कि इहां मिनी फूड पार्क अऊ प्रसंस्करण केन्द्र खोले के तैयारी हे। उमन कहिन कि जिला म लाख, चिरौंजी, सरई बीज के बहुतायत मात्रा म उत्पादन होथे। इहां के सरई बीज के विदेश म भरपूर मांग हे। कहूं स्थानीय स्तर म प्रोसेसिंग यूनिट लगाके इंकर वेल्यु एडीशन करे जाए त बेहतर दाम मिल सकत हे। योजना अंतर्गत रोजगार के अवसर घलोक बाढ़ही।
वन मण्डलाधिकारी श्री मयंक अग्रवाल ह बताइस कि पउर साल 26 हजार क्विंटल लघु वनोपज मन के संग्रहण करे गीस, जेन एक उपलब्धि हे। एखर से संग्राहक मन ल 15 करोड़ रूपिया के लाभ होय हे। उमन बताइन कि संग्रहण के बाद वनधन केन्द्र मन म प्रसंस्करण के सिसटम बनाय गए हे। जिला म संजीवनी केन्द्र मन के माध्यम ले एकर विक्रय करे जात हे। उमन बताइन कि ये साल करीबन 3 हजार क्विंटल चिरौंजी के संग्रहण करे गए हे। जिला पंचायत सीईओ श्री संदीप अग्रवाल ह कहिन कि जिला के विकास म उद्योग के महत्वपूर्ण भूमिका होथे। उद्योग ले ही रोजागार के अवसर बाढ़थे। उमन बताइन कि बिहान अंतर्गत जिला म 8 हजार 500 समूह गठित करे गये हे, जेन अलग-अलग गतिविधि मन के माध्यम ले आय अर्जित करत हें। उमन बताइन कि ये योजना के तहत 241 महिला सदस्य मन के चयन करे गए हे। जिंकर बर 60 लाख रूपिया उद्योग विभाग कोति ले जारी करे जाही। अधिकारी मन ये बेरा म लगाये गये लघु वनोपज मन के उत्पाद मन के स्टॉल के अवलोकन तको करिन।
जानबा हे कि ये योजना के तहत व्यक्तिगत निवेशक ल परियोजना लागत के 35 प्रतिशत के दर ले 10 लाख रूपिया पूंजीगत अनुदान मिलही। स्‍व सहायता समूह मन के प्रति सदस्य मन ल 40 हजार रूपिया के पूंजी प्रदान करे जाही। एखर अलावा किसान उत्पादक संगठन ल 35 प्रतिशत के दर ले पूंजी अनुदान दे जाही। एखर बर जिला पंचायत कार्यालय अउ जिला व्यापार अउ उद्योग केन्द्र ले संपर्क करे जा सकत हे। कार्यशाला म अनुविभागीय अधिकारी श्री विश्वदीप, सीएसआईडीसी के प्रबंध संचालक श्री अनिल श्रीवास्तव, उप संचालक श्री सुरेश केसी, एसआरएलएम के श्री मनोज मिश्रा, महाप्रबंधक श्री एस.के. सिंह, श्री नीरज मिश्रा वैज्ञानिक आईजीकेवी, सीएसआईडीसी के सदस्य अउ महिला समूह के सदस्य मौजूद रहिन।