मेष – आज के राशिफल
(चू, चे, चो, ला, ली, लू, ले, लो, आ. राशि स्वरूप: मेंढा जैसा, राशि स्वामी- मंगल)
आज आप के जोड़ी संग संबंध गुत्तुर रईही, ते पाए के आप के मन प्रसन्न रईही। आज आप अपन घर बनवाए के या घर बर कुछु सजावटी या नवा जिनिस लेहे के उदीम म थोर-बहुत पईसा खरच करहू। आप बर आज के दिन शुभ रहिही। आज आप ल अपन माताजी के हर मामला म सहयोग मिलही, फेर कहू उमन आज आप ल कोनो काम करे ल कहे हे, तेला खच्चित करहू, नइ तो वो नाराज हो सकत हें। आज आप अपन परिवार के छोटे लइका मन ल लेके कोनो जगा घूमे जाए के तको सोंच सकत हव। आज संझा आपके परिवार म कोनो उछाह तको हो सकत हे।
वृष – आज के राशिफल
(ई, ऊ, ए, ओ, वा, वी, वू, वे, वो. राशि स्वरूप: बैल जैसा, राशि स्वामी- शुक्र)
ये राशि वाले पढ़ईया लईका मन ल अपन लक्ष्य ल पाय बर बहुत मेलनत अऊ उदीम करे ल परही, तभे सफलता मिलही। एमा लापरवाही करे म ये राशि वाले मन ल निराशा हाथ लगही। संझा बेरा कहूं आप के परोसी मन ले कोनो वाद-विवाद के स्थिति उठही त आज आप ल चुपे रहना ठीक हे। आज आप ल मीठ बोले के उदीम करना हे करू नी बोलना हे। आज आप के घर म कोनो नजीकी सगा आ सकत हे, जेमां परिवार के सदस्य प्रसन्न नजर आहीं, जेकर आवभगत के सेती आप अपन कोनो जरूरी काम ल आगू बर टाल सकत हव, फेर कोसिस करहू के आप अपन जरूरी काम ल झन टालव।
मिथुन – आज के राशिफल
(का, की, कू, घ, ङ, छ, के, को, ह. राशि स्वरूप: स्त्री-पुरुष आलिंगनबद्ध, राशि स्वामी- बुध)
आज के दिन आप बर कड़ा संघर्ष के दिन रहिही, तेखर सेती आप परेशान रईहू। आप ल थकान अऊ तनाव घलोक हो सकत हे। कहूं आज कोनो काम अइसन हो, जेन आगू बर टलत हो, त वोमें आप ल धैर्य ले काम लेना हे। कहूं आप अइसन नइ करहू, त आप के सहयोगी एकर फायदा उठा सकत हें। संझा आज आप ल थकान अऊ तनाव के सेती कुछ मूड़ी पीरा, देंह पीरा आदि जइसे शिकायत हो सकत हे। आज आप ल अपन भाई मन के सहयोग घलोक हर हालत म मिलत दिखत हे, जेन आप ल मजबूती देही। आज आपके जोड़ी कोति ले घलोक आप ल कोनो शुभ सूचना सुने ल मिल सकत हे।
कर्क – आज के राशिफल
(ही, हू, हे, हो, डा, डी, डू, डे, डो. राशि स्वरूप: केकड़ा, राशि स्वामी- चंद्रमा)
आज आप के परिवार के माहौल उत्सव जइसे रहिही, काबर के आप के परिवार म कोनो शुभ अऊ मांगलिक कार्यक्रम हो सकत हे, जेमां परिवार के सबो सदस्य प्रसन्न नजर आहीं। पारिवारिक एकता घलोक बने रइही। आज आप अपन परिवार अऊ संगी मन के खरीदारी बर घलोक कुछ पईसा खरचा करहू। आज आप ल आंखी म कुछु समस्या परेशान कर सकत हे। आज आप ल कमई के कई ठन रद्दा मिलही, फेर आप ल ओ ल सोरियाना परही, तभे आप आज ओखर लाभ उठा पाहू नइ तो आप आप के सहयोगी एखर से फायदा उठाए के पूरा कोसिस कर सकत हे।
सिंह – आज के राशिफल
(मा, मी, मू, मे, मो, टा, टी, टू, टे. राशि स्वरूप: शेर जैसा, स्वामी- सूर्य)
आज आप ल कोनो निराशाजनक समाचार सुने ल मिल सकत हे, जेखर सेती आप परेशान रईहू, आप अपन पिताजी या बड़े सियान मन ले सलाह मशवरा करके अपन मन ल हल्का कर सकत हव। आज आप अपन जोड़ी के सहयोग ले जेन काम ल करहू, वोमें आप ल सफलता मिलही। संझा आज आप अपन कोनो जुन्ना संगी ले मिलके प्रसन्न होहू। कहूं आप नौकरी करत हव त आज आप ल कोनो काम सौंपे गए हे तेला मन लगा के पूरा ध्यान ले करना होही, नइ तो अपन अधिकारी मन ले गारी खाना पर सकत हे, जेखर से आपके तरक्की घलोक रुक सकत हे।
कन्या – आज के राशिफल
(ढो, पा, पी, पू, ष, ण, ठ, पे, पो. राशि स्वरूप: कन्या, स्वामी- बुध)
आज कहूं आप अपन पईसा कोनो जगा लगाए के सोंचत हव त, पहिली सियान मन ले सलाह लेना चाही। कहूं आप आज कोनो संगी के कहे म कहूं पईसा लगाहू, त भोसा सकत हव। आज आप के गुत्तुर बोलई के सेती काम-धंधा म नवा संगवारी घलोक बन सकत हे। बिहाव बर सगा या रिस्ता आ सकत हे, जेला परिवार के सदस्य मन ल मंजूर करना उचित होही। आज आप अपन काम-धंधा या नौकरी म कोनो बड़का काम निपटाए म जादा मेहनत करना परही, जेखर सेती आप ल थोड़ा थकान महसूस होही।
तुला – आज के राशिफल
रा, री, रू, रे, रो, ता, ती, तू, ते. राशि स्वरूप: तराजू जैसा, राशि स्वामी- शुक्र)
आज के दिन आप बर अड़बड़ सुग्घर रहने वाला हे, काबर के कहूं आप सामाजिक काम करत होहू त वो मन ल मान-सम्मान मिले के जोग हे। आज आप कहूं कोनो नवा व्यवसाय चालू करईया हव, त ओखर बर आप ल कोनो पार्टनर मिले के तको जोग हे। सट्टा खेलईया मन के आज नम्बर मिले के जबर संभावना हे। आज आप ल अपन ससुराल पक्ष के मनखे के वाद विवाद म परे ले बचना होही।
वृश्चिक – आज के राशिफल
(तो, ना, नी, नू, ने, नो, या, यी, यू. राशि स्वरूप: बिच्छू जैसा, राशि स्वामी- मंगल)
आज के दिन आप धार्मिक आयोजन म सम्मिलित होहू अऊ वोकर लाभ घलोक उठाहू। पढ़ईया लईका मन ल आज उंखर पढ़ाई ले कुछ संतोषजनक परिणाम मिलही। कहूं आज आप व्यवसाय बर यात्रा म जाना परय, त खच्चित जावव, काबर के ये यात्रा आप बर लाभदायक रइही। आज के दिन प्रेमी मनखे मन ल अपन संगी संग गोठ-बात करत समय अपन वाणी म संयम रखके बातचीत करना चाही, नइ तो कोनो बनत बात बिगड़ सकत हे अऊ संगी नाराज हो सकत हे। संझा बेरा आज आप अपन जोड़ी ल कहू बाहिर लेके जा सकत हव।
धनु – आज के राशिफल
(ये, यो, भा, भी, भू, धा, फा, ढा, भे. राशि स्वरूप: धनुष उठाए हुए, राशि स्वामी- बृहस्पति)
आज के दिन आप थोकथ उदास रईहू, जेखर सेती आप के काम मन म घलोक रुकावट आही। आज आप अपन हिरदे के कोनो बात या समस्या ल कोनो संग गोठियात बेरा ध्यान देना होही के कोनो आप के वो बात म फायदा झन उठावय। आप के ऊपर कहूं कोनो जुन्ना कर्जा हे, त आज आप ओला उतारे म सफल रईहू। ससुराल पक्ष के कोनो मनखे ले कहूं कुछु वाद विवाद चलत हे, त वो आपके जोड़ी के मदद ले खतम होही। आप अपन परिवार के सदस्य मन बर कोनो पार्टी के आयोजन करे के सोच सकत हव। परिवार के कोनो सदस्य के बिहाव म आवत बाधा आज दूर होही।
मकर – आज के राशिफल
(भो, जा, जी, खी, खू, खे, खो, गा, गी. राशि स्वरूप- मगर जैसा, राशि स्वामी- शनि)
आज के दिन रोजगार के दिशा म काम करत मनखे मन बर उत्तम हे, काबर के उन ल अपन कोनो परिचित परिवार वाले मन के मदद ले बेहतर अवसर मिल सकत हे। आज प्राइवेट नौकरी ले जुड़े मकर राशि वाले मनखे मन ल अपन काम म फोकस रखना होही, नइ त साहेब मन वेतनवृद्धि अऊ पदोन्नति म बाधा डाल सकत हें। ससुराल पक्ष कोति ले आज आप ल धन प्राप्ति के योग बनत हे। कहूं आप के कोनो कोट कचहरी ले संबंधित मामला चलत हे, त वोमे आज आप ल विजय मिल सकम हे। कहूं आप कोनो संपत्ति खरीदी-बिक्री करे के सोचत हव, त बने सहिन सोंच विचार के अऊ जांच-परख के फैसला लेवव, नही त भविष्य म वो संपत्ति आप बर नुकसानदायक साबित होही।
कुंभ – आज के राशिफल
(गू, गे, गो, सा, सी, सू, से, सो, दा. राशि स्वरूप: घड़े जैसा, राशि स्वामी- शनि)
आज के दिन आप के स्वास्थ्य म गिरावट आ सकत हे, जेखर सेती आप परेशान रईहू। नौकरी करइया मन ल वोखर शत्रु आज परेशान करे के पूरा कोसिस करही। आप ल ध्यान रखना होही के आपके कपटी संगी घलव हे, ते पाए के उन ल चिन्हें अऊ उंखर से सावधान रहना जरूरी होही। आज आप कोनो बैंक उ ले करजा लेहे के सोचत हव, त वो आज आप ल आसानी ले मिल जाही। पढ़ईया लईका मन ह कहूं कोनो परीक्षा म भाग लेहे के मन बनाए हे, त वो आज परीक्षा बर आवेदन कर सकत हे। आज संझा आप अपन माता पिता के सेवा करहू।
मीन – आज के राशिफल
(दी, दू, थ, झ, ञ, दे, दो, चा, ची. राशि स्वरूप: मछली जैसा, स्वामी- बृहस्पति)
आज के दिन पढ़ईया लईका मन ल सुग्घर संदेसा मिलही। आज आप अपन व्यापार के कोनो जरूरी निर्णय ल ले सकत हव, फेर एकर बर आप अपन व्यापार के पार्टनर ले घलोक सोच विचार करना होही। आज आप ल अपन परिवार के कोनो सदस्य के स्वास्थ्य के अचानक गिरावट के सेती संझा कुछ परेशानी हो सकत हे, जेखर से आप के कुछ धन घलोक व्यय होही अऊ भागदौड़ घलोक होही। आज आप अपन परिवार के छोटे लइका मन के संउख पूरा करत नजर आहू। आज आप ल अपन कोनो परिजन ले समय म मदद नइ मिले म परेशानी होही।