लॉकडाउन के अफवाह फइला के जादा कीमत म माल बेंचइया गिरोह सक्रिय

रायपुर, कोरोना अऊ ओमीक्रान के प्रकोप ल देखत प्रशासन ह प्रदेश म नाइट करफू लगाए हे। नाइट करफू के समाचार ले राशन सामान अऊ डेली निड्स के संगे संग साग-भाजी अऊ आलू-प्याज के मुनाफाखोरी बाढ़ गए हे। लाकडाऊन फेर लगही अइसे कहि के अभी ले मुनाफाखोर मन कमई चालू कर देहे हें।
हम आप ल बता देवन के शासन ह सिरिफ नाइट करफू लागू करे आदेश देहे हे, दिन म करफू लगाय के अभी कोई आदेश नइ आए हे। फेर कई जमाखोरी करइया कारोबारी मन अफवाह फैलाके कमाई के रद्दा निकालत हें।
प्रदेश म लाकडाऊन के नाम म मुनाफाखोर मन ह अभी ले मनखे मन ल डेरूवा के सामान के कीमत बढ़ा देहे हें। मार्केट ले बीड़ी-सिगरेट, गुटखा गुड़ाखू गायब हो गए हे। पाछ बछर जइसे ये पइत घलोक लाकडाउन के नाम म दुगुना दाम म माल बेचइया गिरोह मन सक्रिय हो गए हें। विमल, राजश्री अऊ दूसर ब्रांड के गुटखा करीबन गायब हे अऊ जेन मिलत हे वो ऊंचा दाम म मिलत हे। आटा-तेल, साबुन, मसाला दुगुना-तिगुना दाम म मिलत हे। लाकडाउन ले तीन दिन पहिली जेन आटा 130 म मिलत रहिस आज वो 150 म मिलत हे। अइसनहे तेल के पैकेट 120 के जगा 150, गुड़ाखू के 85 रूपिया के पैकेट अब 190 ले 220 अऊ 5 रूपिया के गुड़ाखू डिब्बी 15 रूपिया म मिलत हे। अइसनहे दुसर चीज़ मन ल दुकानदार मन ह कीमत बढ़ाके बेचत हें। ज
प्रदेश म कोरोना के बाढ़त रफ्तार अऊ लाकडाउन के आसंका ल देखत जमाखोर अऊ मुनाफाखोर मन ह अवैध रूप ले भंडारण करना शुरू कर देहे हे। शराब कोचिया मन मध्यप्रदेश, महाराष्ट्र ले शराब लाके शहर के बाहिर आउटर म गोडाउन लेके अवैध भंडारण करत हें, पुलिस अऊ आबकारी विभाग के उडऩदस्ता टीम लगातार छापा मार कार्रवाई करके शराब पकड़त हे। जब ले रात के लाकडाउन लगे हे तब ले सब्जी के गाड़ी मन म शराब के सप्लाई करे के मामला आगू आए हे।