युवा मन ह अपन रूचि अऊ प्रतिभा के बल म खोलिन संभावना के नवा अगास : लोकवाणी म मुख्यमंत्री श्री बघेल

रायपुर, मुख्यमंत्री श्री भूपेश बघेल ह आकाशवाणी ले आज प्रसारित रेडियो वार्ता लोकवाणी के 25वां कड़ी म ‘युवा सपने और छत्तीसगढ़‘ विसय उपर प्रदेशवासी मन ले चर्चा करिन। उमन बातचीत के शुरूआत करत पूरा छत्तीसगढ़ वासी मन ल नवा बछर के बधाई दीन अऊ कहिन कि राज्य म पाछू तीन बछर म जनभागीदारी अऊ विकास के जेन ताना-बाना बनाए हें, ओखर से ये विश्वास जागे हे कि नवा साल म सफलता अऊ जन सशक्तिकरण के नवा रंग भरे जाही। हमर छत्तीसगढ़ राज्य घलोक अब 21 साल पूरा कर चुके, एक युवा राज्य हे। 12 जनवरी के युवा मन के प्रेरणास्रोत स्‍वामी विवेकानंद के जन्म दिवस हे, जेन ल हम युवा दिवस के रूप म मनाथन।
श्री बघेल ह कहिन कि नवा साल, युवा सपना, युवा दिवस अऊ नवा छत्तीसगढ़ के बीच एक अंतर्संबंध हे। स्‍वामी विवेकानंद जी के रायपुर ले अटूट नाता हे। ओला चिरस्थायी बनाए बर हमन ऊंखर जन्मदिन 12 जनवरी के ‘युवा महोत्सव’ के आयोजन करे के शुरुआत सन् 2020 म करे रहिन। स्‍वामी जी ह कहे रहिन कि कहूं जात-पात, धर्म-सम्प्रदाय के नाम म हिंसा नइ होतिस त आज के मानव समाज बहुत उन्नत होतिस। ओ जमाना म घलोक स्‍वामी जी दुनिया म घूम-घूम के कहत रहिन कि में इहां कोनो एक धर्म के प्रचार करे नइ आए हंव भलुक अइसन दर्शन के प्रचार करत हंव, जेन दुनिया के सबो धर्म म निहित हे। उमन कहे रहिन कि में कोनो धर्म के विरोधी नइ हंव, हर धर्म के मनखे मन ल तेजस्वी बनाए के प्रयास करत हंव। आज जेन स्‍वामी जी ल आध्यात्मिक संत बताके ऊंखर योगदान ल छोटे करना चाहत हें ओ मन ल बताना चाहथंव कि स्‍वामी जी विरक्ति के बात नइ करत रहिन बल्कि क्रान्ति के बात करत रहिन। कुरीति मन ले लड़े अऊ समाधान के बात करत रहिन।