कड़कनाथ मुर्गी के पालन गायत्री महिला स्व सहायता समूह बर बनिस आय के जरिया, रोजेच बेंचत हें 900 रूपिया के अण्डा

मुंगेली, जिला के विकासखण्ड लोरमी के ग्राम झझपुरीकला के गौठान म कार्यरत् गायत्री महिला स्व सहायता समूह के महिला मन बर कड़कनाथ मुर्गी के पालन आय के जरिया बने हे। समूह के महिला मन कड़कनाथ मुर्गी ले मिले अण्डा ल बेंच के करीबन 900 रूपिया रोजेच आमदनी प्राप्त करत हें। गायत्री महिला स्व सहायता समूह के महिला मन ह बताइन कि समूह म करीबन 10 महिला काम करत हें। ग्राम झझपुरीकला म गौठान स्वीकृति के बाद सामुदायिक मुर्गी शेड के निर्माण करे गए रहिस अउ मुर्गी पालन बर ग्राम गौठान समिति ह उंकर समूह के चयन करे रहिीस। उमन मुर्गी पालन के काम सुरू करिन। एखर संगेच जिला प्रशासन कोति ले मनरेगा ले शेड अउ डीएमएफ मद ले कुक्कुट आहार अऊ आन जरूरी व्यवस्था देहे गीस। पशु धन विकास विभाग कोति ले प्रशिक्षण के बाद बैकयार्ड कुक्कुट पालन योजना अंतर्गत 450 कड़कनाथ के चियां अऊ चिंया बर पॉच महिना के आहार प्रदाय करे गीस। समूह के महिला मन ह बताइन कि करीबन 05 महिना होए के बाद अकतहा नर मुर्गा मन ल बेंचे गीस। समूह तीर अभी हाल म 150 मुर्गि अउ 20 मुर्गा हवय। सबो 150 मुर्गि मन अंडा देवत हें अऊ रोजेच समूह ल 55 ले 60 अंडा मिलथे। कड़कनाथ के अंडा के बहुत मांग होए ले 15 रूपिया प्रति नग के दर ले अंडा बेंचाथे, जेखर से अभी हाल म समूह ल करीबन 900 रूपिया रोजेच के आमदनी प्राप्त होवत हे। समूह के महिला मन के बताती अभी हाल म उमन अपन खुद के व्यय ले 200 अकतहा चिंया बिसाके व्यवसाय बढ़ाए के काम घलोक चालू करे गए हे।