रायपुर, मंगल के दिन गोबर ले बजट के ब्रीफकेस बनइया स्व सहायता समूह के महिला मन बर तब यादगार बन गीस जब खुद मुख्यमंत्री श्री भूपेश बघेल ह ओ मन ल विधानसभा स्थित अपन कार्यालय म बलाके सम्मानित करिन। मुख्यमंत्री ले सम्मानित होए म स्व सहायता समूह के दीदी मन भावुक हो गीन अऊ कहिन कि उमन कभू सोचे घलोक नइ रहिन कि ऊंखर काम के सम्मान खुद मुख्यमंत्री करहीं। ये बेरा म मुख्यमंत्री ह स्व सहायता समूह के दीदी नीलम अग्रवाल, नोमिन पाल, मनीषा पटवा, कांति यादव, लता पुणे ल होली के तिहार के पहिली मिठई घलोक भेंट करिन। मुख्यमंत्री ह दीदी मन ले कहिन कि आप मन के बनाय ब्रीफकेस के चर्चा पूरा देश भर म होवत हे आप मन के ये काम मौलिक तो हेच संगेच म हमार गोधन के घलोक सम्मान ये।
नोमिन ह मुख्यमंत्री ल बताइस कि हमन गोबर ले पेंट बनाए के तैयारी करत हन संगेच गोबर के ईंटा बनाके छत्तीसगढ़ महतारी के मंदिर बनाए के घलोक योजना हे। मुख्यमंत्री श्री भूपेश बघेल ह कहिन कि आप मन के उदीम म हम पूरा सहयोग करबो।
गौठान ह दीस कठिन समें म सहारा –
समूह के नोमिन पाल ह बताइस कि पति के निधन के बाद घर चलाना मुश्किल हो गए रहिस। 6 महीना बहुतेच दिक्कत होइस, फेर अब गौठान के जरिये गोबर ले कई ठन सामान हहमन बनावत हन अऊ महीना म करीबन 15 हजार रूपिया कमा लेथन। होली के पहिलीच गोबर ले बने 150 किलो ले जादा गुलाल बेच उरे हन, दिल्ली ले घलोक गुलाल के आर्डर मिले हे फेर समय के कमी के चलते हमन मना कर देहे हन। गोबर के लकड़ी, मूर्ति, चप्पल घलोक बड़ संख्या म हमन बनावत हन।
आप मन ल बता देवन कि बजट ब्रीफकेस नगर पालिक निगम रायपुर के गोकुल धाम गोठान म काम करइया ‘एक पहल’ महिला स्व सहायता समूह के एसएचजी दीदी नोमिन पाल ह बनाए रहिस। ब्रीफकेस ल गोबर, चुना पावडर, मैदा लकड़ी अउ ग्वार गम के मिक्चर ल परत दर परत लगाके 10 दिन के कड़क मेहनत ले तियार करे गए हे। एही तकनीक ले समूह ह गोबर के खड़ाउ (एक प्रकार के चप्पल ) घलोक बनाथें। ये मां लगे हैंडल अऊ कार्नर कोंडागांव शहर म समूह के बनाए बस्तर आर्ट कारीगर मन ले तियार करवाए गए हे।
