राज्य सरकार के योजना मन ले छत्तीसगढ़ के सबो वर्ग के होवत हे विकास: डॉ. शिव कुमार डहरिया

जांजगीर-चांपा, नगरीय प्रशासन विकास अऊ श्रम मंत्री डॉ शिव कुमार डहरिया ह कहिन हे कि छत्तीसगढ़ सरकार गांव, गरीब, किसान सबो वर्ग के विकास बर काम करत हे। उमन कहिन कि सरकार के योजना मन ले सबो वर्ग के मनखे लाभान्वित होवत हें अऊ ऊंखर विकास के मार्ग प्रशस्त होवत हे। डॉ. डहरिया ह जांजगीर-चांपा के अकलतरा विकासखंड के ग्राम अर्जुनी म जय स्तंभ अऊ जानकी मंदिर के उद्घाटन समारोह ल मुख्य अतिथि के आसंदी ले संबोधित करत रहिन। कार्यक्रम म छत्तीसगढ़ भवन अऊ आन सन्निर्माण कर्मकार कल्याण मंडल के सदस्य श्रीमती मंजू सिंह घलोक उपस्थित रहिन। डॉ. डहरिया ह अपन उद्बोधन म राज्य शासन के कई ठन योजना मन के जिक्र करत कहिन कि सरकार कोति ले संचालित योजना मन ले सबो वर्ग के मनखे मन ल लाभ मिलत हे। उमन कहिन कि शासन के सार्वजनिक वितरण प्रणाली के लाभ एपीएल वर्ग के परिवार ल घलोक मिलत हे।
डॉ. डहरिया ह अपन उद्बोधन म गोधन न्याय योजना, बाड़ी विकास, गौठान, नरवा विकास योजना, स्टॉप डेम आदि के जिक्र करत कहिन कि ए योजना मन ले ग्रामीण अर्थव्यवस्था सुदृढ़ होवत हे। स्व सहायता समूह के महिला मन आर्थिक रूप ले आत्मनिर्भर होवत हें। नगरीय प्रशासन मंत्री ह कहिन कि मुख्यमंत्री श्री भूपेश बघेल के सियानी म छत्तीसगढ़ अपन समन्वित विकास कोति अग्रसर हे। उमन कहिन कि छत्तीसगढ़ सरकार कोति ले अपन करे गए अधिकांश वादा पूरा कर देहे गए हे। एमां किसान मन के कर्ज माफी, बिजली बिल हाफ योजना आदि सामिल हे। अपन उद्बोधन म उमन अर्जुनी म सतनाम समुदायिक भवन निर्माण बर 10 लाख रूपिया के घोषणा करिन। एखर पहिली डॉ. डहरिया ह जय स्तंभ अऊ जानकी मंदिर के विधिवत उद्घाटन करिन। कार्यक्रम ल पूर्व विधायक श्री चुन्नीलाल साहू, राघवेन्द्र कुमार सिंह ह घलोक संबोधित करिन। ये बेरा म सर्वश्री राजकुमार अंचल, श्री पप्पू बघेल, खुलन सोनवानी, दिलेश्वर साहू, सरपंच श्रीमती गीता कुर्रे, सुशांत सिंह, शिव भारद्वाज, महेश्वर टंडन, वहीद खान, दिलावर राणा, गजानंद बंजारे, गणमान्य नागरिक, मीडिया प्रतिनिधि, बड़ संख्या म ग्रामीण जन उपस्थित रहिन।