रायपुर, छत्तीसगढ़ जनसम्पर्क अधिकारी संघ लउहेच मुख्यमंत्री ले मुलाकात करके विभागीय सेटअप ल रिवाइज करे के अनुरोध करही। संघ के प्रांतीय अधिवेशन आज इहां रायपुर म आयोजित करे गीस। अधिवेशन म जनसम्पर्क विभाग ल समकुल सामरथ बनाए खातिर, अधिकारी-कर्मचारी मन के हित ले संबंधित बहुत अकन प्रस्ताव सर्वसम्मति ले पारित करे गीस। बैठक म जनसम्पर्क विभाग के अधिकारी-कर्मचारी मन के कार्य दायित्व ल बने फलियार के बताए खातिर विभागीय मेनुअल तियार करे बर ड्राफ्टिंग कमेटी बनाए के घलोक निर्णय होइस। कार्यालय के सुचारू संचालन बर जनसम्पर्क अधिकारी मन के वित्तीय अधिकार म बढ़ोत्तरी, समयबद्ध पदोन्नति अऊ खाली पद मन म तुरंते भर्ती करे के प्रस्ताव घलोक पारित करे गीस।
संघ के अध्यक्ष श्री बालमुकुन्द तम्बोली ह कहिन कि अभी हाल के हालत म जनसम्पर्क के दायरा दिनों-दिन बढ़त जात हे। जनसम्पर्क विभाग ल प्रिन्ट मीडिया के संगें-संग इलेक्ट्रानिक अऊ सोशल मीडिया ल घलोक शासन के गतिविधि के जानकारी देना होथे। ए सब परिस्थिति मन म अभी हाल के सेटअप पूरा नइ हे। उमन कहिन कि करीबन 22 साल पहिली केवल प्रिन्ट मीडिया ल ही जनसम्पर्क ह खबर देत रहिस, आज के बदले परिस्थिति मन म इलेक्ट्रानिक मीडिया अऊ सोशल मीडिया म घलोक तुरंते शासन के खबर प्रसारित करे जाथे। जनसम्पर्क विभाग के अभी हाल सेटअप विभाग के लगातार बढ़त दायित्व के सेती अपर्याप्त लगत हे। अइसन स्थिति म मीडिया के सबो आयाम म शासकीय योजना, फैसला अऊ गतिविधि मन के लउहे प्रचार-प्रसार करे बर विभाग के सेटअप ल तुरंत रिवाइज करे जाना बिक्कट जरूरी हे।
श्री तम्बोली ह ये घलोक बताइस कि जनसम्पर्क संचालनालय के संगें-संग सबो जिला जनसम्पर्क कार्यालय मन म अऊ जादा संसाधन मन के जरूरत हे, ताकि जनसम्पर्क अधिकारी कुशलता के संग काम मन के संचालन कर सकयं। उमन कहिन कि जनसम्पर्क अधिकारी मन ल साल म पूरा दिन सक्रिय रहि के प्रचार-प्रसार के दायित्व निभाना परथे। ते पाए के जनसम्पर्क अधिकारी मन ल घलोक पुलिस विभाग, वित्त विभाग अऊ विधानसभा सचिवालय के अधिकारी-कर्मचारी मन के जइसे साल म एक महिना के अकतहा वेतन मिलना चाही। आज अधिवेशन म ये संबंध म शासन ले अनुरोध करे म घलोक सर्वसम्मति बनीस।
जनसम्पर्क विभाग कोति ले विशेष प्रचार-प्रसार बर मुख्यमंत्री प्रेस प्रकोष्ठ, मंत्रालय प्रेस प्रकोष्ठ अऊ राजभवन प्रेस प्रकोष्ठ के गठन करे गीस। ए प्रकोष्ठ मन म पदस्थ अधिकारी-कर्मचारी मन ल आन विभाग मन के जइसे विशेष भत्ता अऊ बहुत संख्या म अधिकारी अऊ कर्मचारी पदस्थ करे बर जनसम्पर्क अधिकारी संघ कोति ले जरूरी पहल करे के सहमति बनीस।
जनसम्पर्क विभाग के सहयोगी संस्था छत्तीसगढ़ संवाद म प्रतिनियुक्ति के पद मन म जनसम्पर्क अधिकारी मन के ही नियुक्ति करे के संबंध म घलोक चर्चा अधिवेशन म करे गीस।
अधिवेशन म राज्य सेवा अऊ राज्य वित्त सेवा के जइसे राज्य सूचना सेवा के गठन के संबंध म घलोक शासन ले मांग करे के प्रस्ताव पारित करे गीस। जनसम्पर्क अधिकारी मन ह चर्चा के समय ये संबंध म विचार व्यक्त करिन अऊ कहिन कि सबो विभाग मन म जनसम्पर्क विभाग के अधिकारी मन ल प्रतिनियुक्ति म पदस्थ करे जाए, एखर से प्रचार-प्रसार के काम म बेहतर समन्वय बनही अऊ प्रचार-प्रसार के काम म तेजी आही।
अभी हाल समय म सूचना प्रौद्योगिकी के बढ़त महत्व अऊ जनसम्पर्क अधिकारी मन के कार्य दायित्व अऊ प्रकृति ल देखत सबो जनसम्पर्क अधिकारी मन ल उच्च गुणवत्ता के लैपटॉप अऊ मोबाईल सेट उपलब्ध कराए के संबंध म शासन ले मांग करे के प्रस्ताव घलोक पारित करे गीस।
जनसम्पर्क अधिकारी मन के व्यावसायिक कुशलता बढ़ाए बर अधिवेशन म जनसम्पर्क अधिकारी मन ल समय-समय म राजधानी नई दिल्ली संग देश के कई राज्य मन म प्रशिक्षण बर भेजे के जरूरत महसूस करत ये दिशा म शासन स्तर म जरूरी पहल करे के प्रस्ताव पारित करे गीस। अधिवेशन म छत्तीसगढ़ जनसम्पर्क अधिकारी संघ के कार्यकारिणी के सदस्य मन अऊ पदाधिकारी मन के निर्वाचन घलोक करे गीस।
अधिवेशन म छत्तीसगढ़ जनसम्पर्क अधिकारी संघ के संरक्षक श्री जे.एल. दरियो, श्री उमेश मिश्रा, प्रधान संयोजक श्री संजीव तिवारी, संयोजक श्रीमती हर्षा पौराणिक, महासचिव श्री आलोक देव, सचिव श्री राजेश श्रीवास, कोषाध्यक्ष श्री लक्ष्मीकांत कोसरिया संग जनसम्पर्क संचालनालय अऊ जिला जनसम्पर्क कार्यालय मन म पदस्थ जनसम्पर्क अधिकारी उपस्थित रहिन।
छत्तीसगढ़ जनसम्पर्क अधिकारी संघ ह संघ अऊ सरकार के हित बर मुख्यमंत्री मेर मिल के करही गोठ-बात
