बिलासपुर, मुख्यमंत्री भूपेश बघेल के निर्देश म संजीवनी सहायता कोष योजना ले जिला के अनुष्का ल नवा जीवन मिले हे। अनुष्का के माता-पिता इपन बेटी के संग संभागायुक्त कार्यालय पहुंचिन अऊ खुशी व्यक्त करत आयुक्त डॉ. संजय अलंग ले मिलके आभार व्यक्त करिन।
बिलासपुर के सिरगिट्टी के रहइया अनुष्का कक्षा आठवीं म पढ़थे। अनुष्का ल किडनी ले जुड़े जटिल बीमारी रहिस, डॉक्टर ह किडनी ट्रान्सप्लांट करे के सलाह दीस। पिता एक निजी कंपनी म छोट कन नौकरी करके कइसनहो परिवार के भरण-पोषण करत हे। अइसन हालत म बिटिया के इलाज के खरचा उठा पाना मुश्किल होत रहिस।
पिता अजय ह बिटिया के इलाज बर प्रशासन ले मदद मांगिस। तत्कालीन कलेक्टर डॉ. संजय अलंग ह अजय ल संबल देवत तुरंत मदद के अश्वासन दीस। डॉ अलंग के पहल म मुख्य स्वास्थ्य चिकित्सा अउ स्वास्थ्य अधिकारी डॉ. प्रमोद महाजन के मार्गदर्शन म बेटी अनुष्का ल किडनी ट्रान्सप्लांट बर संजीवनी सहायता कोष ले 3 लाख के सहायता राशि उपलब्ध कराए गीस। 24 अगस्त 2021 के अनुष्का के तमिलनाडु के सी.एम.सी. वैल्लूर म किडनी के सफल प्रत्यारोपण होइस, अब वो पूरा स्वस्थ हे।
पिता अजय ह कहिस कि विषम परिस्थिति म प्रशासन ले सहयोग मिले ले न केवल हौसला बाढि़स भलुक भविष्य बर उम्मीद घलोक जागे हे। डॉ. अलंग ह बेटी अनुष्का ल आर्शीवाद देवत मन लगाके पढ़ाई करे अऊ खूब आगू बढ़े बर प्रोत्साहित करिन।
अनुष्का ल मिलीस नवा जीवन : संजीवनी सहायता कोष ले मिलीस 3 लाख के मदद संभागायुक्त डॉ. अलंग ले मिलके मदद बर जताइस आभार
