सक्‍ती के राजेश जायसवाल करत हे छेना बेंच के हर महिना एक लाख कमई

मुख्यमंत्री के प्रति जनपद प्रतिनिधि अऊ सरपंच मन ह आभार प्रकट करिन

रायपुर, मुख्यमंत्री श्री भूपेश बघेल ले सक्ती क्षेत्र के जनपद सदस्य अउ सरपंच मन ह मुलाकात करिन। प्रतिनिधि मंडल ह ऊंखर मानदेय बढ़ाए के घोषणा उपर मुख्यमंत्री के प्रति आभार व्यक्त करिन। ये बेरा म कृषक उद्यमी श्री राजेश जायसवाल ह मुख्यमंत्री ल पैकेजिंग करे गोबर छेना, पैराकुट्टी अऊ गोमूत्र भेंट करिस। श्री जायसवाल ह बताइस कि ए उत्पाद मन ल ऑनलाईन बाजार के माध्यम ले पूरा देश म बेचे जात हे अऊ हर महीना करीब एक लाख रूपिया के कमई होवत हे। मुख्यमंत्री ह श्री जायसवाल के काम के सराहना करत कहिन कि प्रदेश के युवा श्री जायसवाल ले प्रेरणा लेवव अऊ आत्मनिर्भर बनव।
जानबा हे कि जनपद पंचायत अध्यक्ष मन के मानदेय 6 हजार ले बढ़ाके 10 हजार रूपिया प्रतिमाह करे गए हे। जनपद पंचायत उपाध्यक्ष मन के मानदेय 4 हजार ले बढ़ाके 6 हजार अउ जनपद पंचायत सदस्य मन के मानदेय 1 हजार 500 ले बढ़ाके 5 हजार प्रतिमाह करे गए हे। सरपंच मन के भत्ता 2 हजार ले बढ़ाके 4 हजार अउ पंच मन के भत्ता 200 ले बढ़ाके 500 रूपिया प्रतिमाह करे गए हे।