तीन सड़क अऊ दू पुल के निर्माण कराए जाही
जोगापाठ के पांच ग्राम पंचायत म पहुंचही बिजली
रायपुर, मुख्यमंत्री श्री भूपेश बघेल के भेंट-मुलाकात अभियान के पहिली दिन सामरी विधानसभा क्षेत्र के कुसमी के बाद दूसर पड़ाव शंकरगढ़ रहिस। जिहां उमन शंकरगढ़ के जनपद कार्यालय अऊ सामुदायिक स्वास्थ्य केन्द्र के पोषण पुनर्वास केन्द्र के निरीक्षण करिन।
मुख्यमंत्री ह आमजनता ले भेंट-मुलाकात के समय शंकरगढ़ म कृषि महाविद्यालय खोले के घोषणा करिन। उमन जगिमा, पटना होकर कोदोडीपा एनएच-343 के बीच वनभूमि म करीब 7 किमी. सड़क के डामरीकरण, गलफुल्ला नदी म बने पुल के ऊंचाई बढ़ाए, धारानगर ले हरिलेटा पहुंच मार्ग म बिछरी नदी म पुल निर्माण, ग्राम पोंड़ी खुर्द ले जिला जशपुर के ग्राम सुलेशा के बीच दनगरी घाट तक करीब 12 किमी सड़क निर्माण के घोषणा करिन। ये मौका म उमन कहिन, जोगापाठ के पांच ग्राम पंचायत मन म जिहां बिजली नइ पहुंचे हे, उहां बिजली प्रदाय के व्यवस्था करे जाही। मुख्यमंत्री ह महुआडीह ले भरतपुर के बीच सड़क निर्माण के घलोक स्वीकृति दीन।
मुख्यमंत्री ह सामुदायिक स्वास्थ्य केन्द्र के निरीक्षण के समय एनआरसी म भर्ती लइका मन के स्वास्थ्य के बारे म चिकित्सक अऊ अभिभावक मन ले जानकारी लीन अऊ लइका मन के लउहे स्वास्थ्य लाभ के कामना करिन। मुख्यमंत्री ह ये मौका म चिकित्सक मन ल हिदायत दीन के सबो जरूरी दवई अस्पताल म होना चाही। सबो चिकित्सक जेरेरिक दवई ही लिखव। अस्पताल म अवइया सबो मरीज मन ल उपचार के सुविधा मिलय। एकर विशेष ध्यान रखे जाय। उमन कहिन कि डॉक्टर ओपीडी म उपस्थित रहि के मरीज मन के उपचार करव। उमन अस्पताल म सबो जरूरी उपकरण मन ल चालू हालत म रखे के हुकुम दीन।
