मुख्यमंत्री के घोषणा म जल्दी अमल

रामचन्द्रपुर अऊ सनावल म आज एक-एक एमबीबीएस डॉक्टर ह पदभार ग्रहण करिस
रायपुर, मुख्यमंत्री श्री भूपेश बघेल के घोषणा के मुताबिक रामचन्द्रपुर अऊ सनावल के प्राथमिक स्वास्थ्य केन्द्र म एक-एक एमबीबीएस डॉक्टर ह पदभार ग्रहण कर लीस। मुख्यमंत्री ह 5 मई के सनावल म आयोजित भेंट-मुलाकात कार्यक्रम म आमजनता के मांग म ए जगा मन म एमबीबीएस डॉक्टर के पदस्थापना करे के घोषणा करे रहिन।
मुख्यमंत्री के घोषणा म अमल करत मुख्य चिकित्सा अउ स्वास्थ्य अधिकारी बलरामपुर-रामानुजगंज कोति ले 11 मई के ए दुनों स्वास्थ्य केन्द्र म डॉक्टर मन के पदस्थापना के आदेश जारी कर दीन, जेखर परिपालन म आज प्राथमिक स्वास्थ्य केन्द्र रामचंद्रपुर म डॉ. हेमंत दीक्षित अऊ प्राथमिक स्वास्थ्य केन्द्र सनावल म डॉ. अंकित सिंह ह पदभार ग्रहण करके मरीज मन के इलाज चालू कर देहे हे।