खरीफ 2022 म धान के रकबा म पांच लाख हेक्टेयर के कमी, आन फसल मन के खेती ल प्रोत्साहित करव: मुख्य सचिव

रायपुर, मुख्य सचिव श्री अमिताभ जैन ह आज कृषि विभाग के योजना मन के मैदानी स्तर म क्रियान्वयन के प्रगति के समीक्षा करिन। मंत्रालय महानदी भवन म आयोजित ये बैठक म कृषि विभाग संग बीज निगम, मंडी बोर्ड, उद्यानिकी, पशुधन, मछलीपालन अऊ जल ग्रहण क्षेत्र प्रबंधन के काम मन के समीक्षा करे गीस। विभाग कोति ले संचालित होवत केन्द्र अऊ राज्य के योजना मन के संगेच राज्य के फ्लैगशिप योजना मन के प्रगति अऊ आगामी खरीफ साल 2022 के तैयारी के संबंध म घलोक विस्तार ले चर्चा करे गीस।
मुख्य सचिव ह विभागीय योजना मन के प्रगति ल संतोष जनक बतात फ्लैगशिप योजना मन के क्रियान्वयन म तेजी लाय के निर्देश दीन। मुख्य सचिव श्री जैन ह कहिन कि राज्य शासन ह खरीफ 2022 म पाँच लाख हेक्टेयर धान के रकवा ल आन फसल ले प्रतिस्थापित करे के लक्ष्य रखे हे। एखर बर आन फसल मन के गुणवत्ता वो बीज के भण्डारण सहकारी समिति मन म समय म करे के निर्देश देहे हें। पउर साल म जेन किसान मन ह धान के अकतहा आन फसल मन के उत्पादन करत रहिन, वो किसान मन के सहकारी समिति स्तर म 16 मई ले 15 जून के अवधि म बैठक आयोजित करे अऊ उंखर व्यवहारिक समस्या मन ल जानके ओखर निराकरण करे ल कहिन। किसान मन ल आन फसल मन बर आसानी ले ऋण स्वीकृत हो सकय, ये खातिर प्रक्रिया के सरलीकरण के निर्देश अपेक्स बैंक ल देहे गे हे। श्री जैन ह कहिन कि सुनिश्चित सिंचाई वाले क्षेत्र मन म उद्यानिकी फसल मन ल बढ़ावा देहे जाय। उमन उद्यानिकी फसल मन के उत्पादन बर किसान मन ल प्रेरित करे ल कहिन। प्रधानमंत्री किसान सम्मान निधि म राज्य के 36.46 लाख कृषक मन ल लाभान्वित ल कहे गीस। एमां ले 18.13 लाख कृषक मन के केवाईसी अपडेट हो चुके हे। बाकी बचे किसान मन के केवाईसी अपडेट के काम म तेजी लाय के निर्देश देहे गए हे।