रायपुर, वन, परिवहन, घर अउ जलवायु बदलाव मंत्री श्री मोहम्मद अकबर ले ऊंखर राजधानी स्थित निवास कार्यालय म मरार (पटेल) समाज के कबीरधाम जिला इकाई के प्रतिनिधि मंडल ह सौजन्य भेंट करिन। प्रतिनिधि मंडल म पटेल समाज के नवनिर्वाचित जिला अध्यक्ष श्री भगवान सिंह पटेल संग आन पदाधिकारी सामिल रहिन।
कबीरधाम जिला अध्यक्ष श्री भगवान सिंह पटेल ह मंत्री श्री मोहम्मद अकबर ल पटेल समाज के हित म करे जात काम मन बर उंखर आभार व्यक्त करत अभिनंदन करिस। वन मंत्री ह श्री भगवान सिंह पटेल ल जिला अध्यक्ष निर्वाचित होए बर बधाई अउ शुभकामना दीन। वन मंत्री ह जिला अध्यक्ष ल पटेल समाज के मजबूती बर समाज के सबो मनखे मन ल संग लेके चले ल कहिन। श्री मोहम्मद अकबर ह पटेल समाज के प्रशंसा करत कहिन कि पटेल समाज मेहनतकश समाज हे, जेन दिन-रात एक करके अपन पसीना बोहा के साग-सब्जी अऊ आन फसल के उत्पादन करथे। उमन प्रतिनिधि मंडल के आगू अपन विचार प्रकट करत कहिन कि आज पटेल समाज राजनैतिक रूप ले जागरूक समाज हे। पटेल समाज के मनखे आज छत्तीसगढ़ शासन के अलग-अलग इकाई म प्रतिनिधित्व करत हे।
पटेल समाज के जिलाध्यक्ष भगवान सिंह पटेल ह मंत्री श्री मोहम्मद अकबर ल भरोसा देवाइस कि ओ मन समाज के सबो मनखे मन ल विश्वास म लेत समाज के हित म हमेसा सक्रिय रइहीं। उमन अपेक्षा करिन कि ओ मन भविष्य म पटेल समाज ल नवा-नवा सौगात देवत रइहीं। पटेल समाज के प्रतिनिधि मंडल म सर्वश्री हरि पटेल सदस्य छत्तीसगढ़ शाकंभरी बोर्ड, राजू पटेल जिला इकाई सचिव, तुलसी पटेल जिला प्रवक्ता, राम चरण कुसरो, कैलाश पटेल, रामअवतार पटेल, लेखराम पंचेश्वर, विश्वनाथ पटेल आदि सामिल रहिन।
समाज के मजबूती बर एकजुटता जरूरी हे – मंत्री श्री मोहम्मद अकबर
