मां अम्बे समूह के महिला मन ह पोल बेचके कमाइन 9 लाख रूपिया
कोरिया, जिला के ग्राम पंचायत चेरवापारा स्थित मल्टीएक्टिविटी सेंटर म फेंसिंग पोल बना के महिला मन लखपति बनत हें। जानबा हे कि राज्य सरकार के महत्वाकांक्षी योजना नरवा, गरवा, घुरवा अऊ बाड़ी-गौठान (मल्टीएक्टिविटी सेंटर) के माध्यम ले ग्रामीण महिला मन ल मल्टीएक्टिविटी गतिविधि ले जोड़े जात हे। इही कड़ी म चेरवापारा के मां अम्बे स्व-सहायता समूह के महिला मन ह फेंसिंग पोल बना के 9 लाख रूपिया शुद्ध मुनाफा कमाके लखपति बन गए हें। मल्टिएक्टिविटी गतिविधि मन के माध्यम ले अकतहा आमदनी कमा के पूरा प्रदेश के महिला मन आत्मनिर्भरता के दिशा म एक नवा रद्दा बनावत हें।
आप मन जानतेच हव के गौठान म स्व-सहायता समूह के महिला मन वर्मी कम्पोस्ट बनाए के संगे-संग मल्टीएक्टिविटी सेंटर मन म खाद्य प्रसंस्करण, पोल निर्माण, पेवर ब्लाक निर्माण, ट्री गार्ड निर्माण, किचन गार्डन, टॉयलेटरिज, सैनिटरी नैपकिन, साबुन, डिटर्जेंट निर्माण, सामुदायिक बाड़ी जइसे गतिविधि ले लाखों के आय अर्जित करत हें।
मां अम्बे समूह के महिला मन के बताती ओ मन चेरवापारा मल्टीएक्टिविटी सेंटर म समूह के पांच महिला मन फेंसिंग पोल बनाए के काम करथें। बीते दू साल म 8 हज़ार ले जादा फेंसिंग पोल उमन बनाए हें अऊ कुशल व्यवसायी के जइसे ओला बेंच घलव हें। समूह के सदस्य श्रीमती विमला राजवाड़े ह बताईस के अब तक 8 हज़ार 880 फेंसिंग पोल के बिक्री होए हे। एखर से समूह ल 26 लाख 25 हजार रूपिया के आय होइस। ये मां समूह ल 9 लाख रूपिया के शुद्ध मुनाफा होय हे। ए हिसाब ले हर एक महिला मन ल डेढ़ लाख रूपिया के आमदनी होए हे। विमला आगू बताईस के आजीविका संवर्धन बर संचालित ए गतिविधि मन ले ओ मन ल जेन राशि मिलीस, वो ऊंखर संकट के बेरा म काम आइस। पति के देहांत के बाद वोखर परिवार के आजीविका के संग-संग तबियत खराब होए अऊ बेटे के शादी म घलोक ये रकम काम आइस।
हम आप ल बता देवन के उंखर समूह तीन साल ले फेंसिंग पोल निर्माण के काम करत हे। समूह म ऊंखर संग राजकुमारी, फुलेश्वरी, किस्मत बाई अऊ लीलावती शमिल हे। कोरोना काल म काम थोकन धीमा रहिस। कोरोना म आए कमी के बाद काम म तेजी लात इमन पोल बनाना शुरू करिन। 1 दिन म महिला मन करीबन 60 पोल बना लेथें। एक पोल के लागत 210 रूपिया तक आथे। एक पोल 270 ले 300 रूपिया म बेंचाथे। एक पोल म 80-90 रूपिया के मुनाफा हो जाथे। समूह के महिला मन बताईन कि राज्य शासन के महत्वाकांक्षी योजना अउ मल्टिएक्टिविटी सेंटर ले अब गांव म ही रोजगार मिलत हे अऊ ओ मन आत्मनिर्भर बनत हें।
