सरकार तुंहर दुवार शिविर म लल्लूसिंह ल मिलीस बिना ब्याज के 35 हजार रूपिया के करजा

कोरबा, कलेक्टर रानू साहू के बताए रद्दा म सरकार तुंहर दुवार कार्यक्रम के तहत आयोजित करे जात शिविर ले जिला म रहवईया मन ल अड़बड़ फायदा होवत हे। शिविर के पहिली घर-घर सर्वे करके मनखे मन के समस्या ले संबंधित आवेदन लेहे जात हे। मिले आवेदन मन के निराकरण करके शिविर स्थल म मनखे मन ल सेवा ले लाभान्वित करे जात हे। अइसनहेच लाभ नगर निगम क्षेत्रांतर्गत वार्ड सुमेधा के किसान श्री लल्लू सिंह ल मिले हे। आज निगम क्षेत्र के दर्री म आयोजित सरकार तुंहर दुवार शिविर के माध्यम ले लल्लू सिंह के खेती-किसानी करे बर जरूरी रकम के पूर्ति होइस। किसान लल्लू सिंह ल प्रशासन कोति ले बिना ब्याज के 35 हजार रूपिया के चेक प्रदान करे गीस। राजस्व मंत्री श्री जयसिंह अग्रवाल ह जनप्रतिनिधि मन के मौजूदगी म किसान ल चेक दीन। किसान लल्लू सिंह ल सहकारिता विभाग कोति ले खेती-किसानी म सहायता प्रदान करे ब्याजमुक्त ऋण देहे गीस। एखर से किसान ल बेफ्रिक होके पइसा के चिंता करे बिना खेती करे म मदद मिलही।
सुमेधा के किसान श्री लल्लू सिंह के बताती वोला ब्याजमुक्त ऋण मिले ले खेती-किसानी म लगइया पइसा के चिंता दूर हो गे। वोखर तिर करीबन तीन एकड जमीन हे। ये जमीन म वो धान फसल के खेती करत हे। एखर संगें-संग सब्जि के घलोक फसल लेथे। किसान लल्लू सिंह ह बताइस कि शासन कोति ले किसान मन ल ऋण के अलावा खाद-बीज घलोक देहे जात हे। वो ह बने फसल के सोच ल क्रियान्वित करे बर सहकारी समिति ले खाद-बीज के उठाव घलोक करे हे। जेखर से उन्नत अऊ जादा पैदावार करे म मदद मिलही। लल्लू सिंह ह बताइस कि ओ ल राजीव गांधी किसान न्याय योजना के घलोक लाभ मिलत हे। किसान ह बताइस कि सहकारी समिति के अधिकारी-कर्मचारि मन ह ब्याजमुक्त ऋण के सुविधा के बारे म बताए रहिन। समिति के माध्यम ले जरूरी आवेदन प्रस्तुत करे के बाद शिविर स्थल म चेक राशि प्रदान करे गीस। लल्लू सिंह ह ऋण देके खेती आसान करके राहत देहे बर जिला प्रशासन के आभार जताए हे।