बेमेतरा, तरपोंगी के रहवईया भारती के हिमोग्लोबिन 6 ग्राम, वजन 45 किलो रहिस, जेखर सेती वो एनिमिया के शिकार रहिस अऊ ओखर लइका म घलोक एनिमिक होए के खतरा मंडरात रहिस। उही समय 14 नवंबर 2021 के मुख्यमंत्री श्री भूपेश बघेल के फ्लैगशीप योजना के अंतर्गत गर्भवती अउ शिशुवती माता मन ल केला, पौष्टिक लड्डू ( मुर्रा, चना, फल्लीदाना, तिल, गुड़ ले बना 50 ग्राम) देना सुरू करे गीस जेखर असली उद्देश्य गर्भवती शिशुवती माता अउ लइका मन के पोषण संवर्धन करना रहिस।
ये योजना के अंतर्गत हफ्ता के हर सोमवार बुधवार अऊ सुकरवार के लड्डू अऊ हर मंगलवार, बिरसपत, सनिवार के केला देहे जाथे। पौष्टिक लड्डू के सेवन ले भारती के स्वास्थ्य सुधरे लगिस अऊ वो एक दिन स्वस्थ शिशु ल जन्म दीस। प्रसव के बाद घलोक भारती मुख्यमंत्री सुपोषण योजना के अंतर्गत शिशुवती माता के रूप म लगातार लड्डू अउ केला के सेवन करत रहिस। आज भारती के वजन 55 किलो ग्रा. अउ हिमोग्लोबिन के स्तर 11.7 ग्राम हे अउ ओखर शिशु 8 किलो ग्रा. के एक स्वस्थ्य बालक हे। भारती के जीवन के अहम पड़ाव म मुख्यमंत्री सुपोषण योजना एक संजीवनी के जइसे आके ओला अऊ ओखर शिशु ल एनिमिया के चक्र ले मुक्त कर दीस।
मुख्यमंत्री सुपोषण योजना ले भारती अऊ ओखर लइका होइस एनीमिया ले मुक्त
