योग मनुष्य के शारीरिक, मानसिक अऊ आध्यात्मिक ऊर्जा बढ़ाथे: मुख्यमंत्री श्री भूपेश बघेल

Surabhi Tiwari

मुख्यमंत्री ह अंतर्राष्ट्रीय योग दिवस म नई दिल्ली के छत्तीसगढ़ सदन म करिन योगाभ्यास

रायपुर, मुख्यमंत्री श्री भूपेश बघेल ह आज आठवां अंतर्राष्ट्रीय योग दिवस म नई दिल्ली के छत्तीसगढ़ सदन म बिहनिया योग के कई ठन मुद्रा मन के अभ्यास करिन। ये बेरा म उमन प्रदेशवासी मन ल योग दिवस के बधाई अऊ शुभकामना देवत मनखे मन ले योग ल अपन दिनचर्या म अनिवार्य रूप ले सामिल करे के अपील करिन। मुख्यमंत्री ह कहिन कि नियमित योग करे ले शरीर स्वस्थ रहिथे अऊ मन के एकाग्रता बाढ़थे।
मुख्यमंत्री श्री बघेल ह अपन संदेश म कहिन कि जीवन के सबले बड़े उपलब्धि हे स्वस्थ रहना। योग मनुष्य के शारीरिक, मानसिक अऊ आध्यात्मिक ऊर्जा ल बढ़ाथे। हम अपन जीवन म योग ल जोड़न अऊ रोग ल दूर भगावन। योग सिरिफ कसरत नो हे, भलुक ये एक ऊर्जा के रूप म काम करथे। आप मन योग ल अपनाके पूरा उमर सेहतमंद रहि सकथव अऊ बीमारी ले बचे रह सकत हव।
कोरोना काल म ये स्पष्ट हो गए हे कि केवल धन-संपदा ही महत्वपूर्ण नइ हे, बल्कि स्वस्थ तन अऊ स्वस्थ मन दुनों के जरूरत होथे। ते पाए के तंदुरूस्त रहे बर नियमित योग बहुत जरूरी हे। योग हमर प्राचीन परंपरा हे। कहूं हम सब नियमित रूप ले योग करन त तन घलोक स्वस्थ रहिही अऊ मन घलोक स्वस्थ रहिही। जीवन म सकारात्मकता आही। ते पाए के योग नियमित करव, एकर लाभ उठावव। श्री बघेल ह कहिन कि तन अऊ मन दुनों स्वस्थ रइही त हम जम्‍मो उलट हालत के सामना कर सकबो।
मुख्यमंत्री ह कहिन कि अभी हाल के समय म हमन सिरिफ भौतिक साधन मन ल ही सफलता के पैमाना मान लेहे हन, जबकि स्वस्थ तन अऊ स्वस्थ मन के बिना हर सफलता अधूरा हे। कोरोना-संकट के दौर म योग के प्रासंगिकता अऊ बाढ़ गए हे। तन-मन ले चुस्त-दुरुस्त रहि के ही हम गढ़बो नवा छत्तीसगढ़ के सपना ल लउहे साकार कर सकबो।
#YogaDay
#YogaForHumanity #yogaday2022 #योगदिवस #yoga

लउछरहा..