नागोपहरी गांव म हर-घर म पहुंचिस नल, घरे म मिले लगिस शुद्ध पेयजल

मुंगेली, जिला के नागोपाहरी गांव विकासखण्ड मुंगेली के एक छोटकुन गांव ये। भले ये गांव म रहइया परिवार के संख्या कमती हे, फेर पानी ल लेके इहां के समस्या बड़का रहिस। इहां के मनखे मन ल पहिली हैंडपंप ले ही पानी मिलत रहिस, फेर गरमी के दिन म हैंडपंप के जल स्तर तरी जाए के सेती ओ मन ल पानी के एक बून्द घलोक नइ मिलत रहिस, जेखर सेती ओ मन ल पानी बर दूरिहा जाना परत रहिस। अब गांव म जल जीवन मिशन के तहत घर म नल कनेक्शन मिले ले अब ऊंखर घरेच म पानी के धार बोहाए लगे हे।
नागोपाहरी गांव जिला मुख्यालय ले करीबन 20 किलोमीटर दुरिहा हे। जिहां जल जीवन मिशन योजना के तहत सोलर ड्यूल पम्प लगाए गए हे। जल संकट वाले ये गांव म हर साल गरमी म पानी के समस्या विकराल हो जात रहिस। गांव के श्रीमती ललिता मोहले ह बताइस कि गांव म एकेच बोरिंग रहिस, जिहां पानी बर ओ मन ल हमेशा लाइन लगाना परय। गर्मी म तो बोरिंग सुखा जात रहिस ते पाए के ओ मन ल पानी बर आन जघा दुरिहा जा ल परत रहिस। गांव म जब ले सोलर पंप लगे हे तब ले गांव वाले मन ल पीए के पानी मिले लगे हे। उमन बताइस कि घर म पेयजल बर सबले जादा महिला मन ल ही परेशानी उठाना परत रहिस। पानी बर ओ मन ल दूसर के घर म जाना परय कभू ओ मन ल पानी मिलय कभू नइ मिलत रहिस। फेर अब जब ले ऊंखर घर म नल कनेक्शन लगे हे, तब ले ओ मन ल भरपूर पानी मिलत हे।
दिव्यांग सुरुचि आहिरे ह बताइस कि सोलर ड्यूल पम्प ले ओ मन ल स्वच्छ पेयजल घरे म मिलत हे। अइसनहे आन गांव वाले मन ह बताइस कि जल जीवन मिशन के तहत ऊंखर घर म नल कलेक्शन के माध्यम ले शुद्ध पेयजल मिले ले गांव वाले मन ल राहत मिले हे।