रायपुर, नगरीय प्रशासन अऊ विकास अऊ श्रम मंत्री डॉ. शिवकुमार डहरिया ह रायपुर जिला के नगर पंचायत समोदा म करीब तीन करोड़ 41 लाख 92 हजार रूपिया के कई ठन विकास अऊ निर्माण काम मन के भूमिपूजन अऊ लोकार्पण करिन। एमां दू करोड़ 94 लाख के लागत के नौ काम मन के भूमिपूजन अऊ 46 लाख 30 हजार रूपिया के कुल पांच काम मन के लोकार्पण करे गीस।
डॉ. डहरिया ह कहिन कि प्रदेश के सबो नगरीय अऊ ग्रामीण क्षेत्र मन म आम मनखे मन के सुविधा बर सबो जरूरी निर्माण अऊ विकास के काम कराए जात हे। उमन कहिन कि छात्र मन के बेहतर शिक्षा प्रदान करे बर स्वामी आत्मानंद स्कूल खोले जात हे। प्रदेश के सबो नागरिक मन ल सार्वजनिक वितरण प्रणाली ले राशन मिलय ते पाय के सबो परिवार के राशन कार्ड बनाये जात हे। उमन बताइन कि समोदा नगर पंचायत बन जाय ले अब सबो नागरिक सुविधा इहां उपलब्ध होही।
डॉ. डहरिया ह नगर पंचायत समोदा के अंतर्गत आठ जगा मन म एक करोड़ 34 लाख 34 हजार रूपिया के लागत ले सीसी रोड निर्माण अऊ 17 लाख 55 हजार के लागत ले चार जगा मन म आरसीसी नाली निर्माण के काम मन के भूमिपूजन करिन। समोदा नगर पंचायत के वार्ड क्रमांक-1 म महिला सामुदायिक भवन लागत 11 लाख 58 हजार, यादव पारा म सामुदायिक भवन लागत 11 लाख 98 हजार अऊ निषाद पारा म 11 लाख 98 हजार रूपिया के लागत ले बनइया सामुदायिक भवन के भूमिपूजन करिन। नगर पंचायत क्षेत्र के अंतर्गत दू जगा म बाउंड्रीवाल लागत 22 लाख 83 हजार रूपिया, चार जगा म बस स्टाप लागत 15 लाख 18 हजार रूपिया, चार जगा म हाई मास्ट लाईट स्थापना बर 19 लाख 54 हजार रूपिया अऊ विद्युत पोल स्थापना अऊ एल्टीलाइन लागत 49 लाख 24 हजार रूपिया के लागत के काम मन के भूमिपूजन करिन। ऐसनहे समोदा नगर पंचायत के अंतर्गत पांच जगा म करीब 46 लाख 30 हजार रूपिया के लागत के सार्वजनिक शौचालय के लोकार्पण करिस। ये बेरा म श्री खिलेश देवांगन, श्री कोमल साहू, श्री आजूराम वंशे संग क्षेत्रीय जनप्रतिनिधि अऊ बड़ी संख्या म नागरिक उपस्थित रहिन।
