अरे तैं तो 60 साल के जवान अस: अइसन गेड़ी चढ़त मैं आज तक कोनो ल नइ देखेंव – मुख्यमंत्री

हरेली म तीरथराम ल सीएम ले मिले के अइसन ललक कि दू साल ले गेड़ी म करत रहिन 10 किलोमीटर के सफर
मुख्यमंत्री श्री भूपेश बघेल ल पता चलिस त तुरंते तीर म बलाइन अऊ देखिन तीरथराम के हुनर, सहरईन घलोक
रायपुर, अरे तैं तो 60 साल के जवान अस। देखा तो गेड़ी म अपन हुनर। मुख्यमंत्री श्री भूपेश बघेल ल जब पता चलिस कि बुजुर्ग तीरथ राम सिन्हा पाछू दू साल ले गेड़ी म चढ़के उंखर से मिले आवत हे। त उमन तुरंते तीरथराम ल मिले बर बलाइन अऊ मयारूक बात करिन। दरअसल आज बिरसपत के मुख्यमंत्री निवास म हरेली तिहार के अवसर म कार्यक्रम के आयोजन रहिस। जेमां रायपुर समेत राज्यभर के मनखे शिरकत करे आथें। अइसनहे एक मनखे तीरथराम सिन्हा हे, जेन रायपुर जिला ले 10 किलोमीटर दूर जोरा गांव म रहिथे। ओकर बताती वो ह पाछू दू साल ले सरलग हरेली तिहार म मुख्यमंत्री जी ले मिले आवत रहिस फेर मुलाकात नइ हो पात रहिस। फेर आज मुख्यमंत्री जी ल मोर बारे म पता चलिस त उमन खुदे बंगला के भीतर बलवाइन अऊ मोर से बात करिन। तीरथराम ह मुख्यमंत्री ल बताइन कि वो ह जोरा ले 10 किलोमीटर गेड़ी चढ़के आए हंव अऊ आप मन ल गेड़ी म चढ़के देखाना चाहत हंव। तब मुख्यमंत्री ह कहिन कि जरा देखा अपन हुनर। तीरथराम तुरंते चंउपा कूद के दुनों गेड़ी म एक संग चढ़ गे। वोखर ये हुनर ल देखके मुख्यमंत्री बोल परिस अरे वाह तें तो 60 साल के जवान अस। मुख्यमंत्री ले मिले के बाद तीरथराम ह कहिस कि आज मिलके अड़बड़ अच्छा लगिस। प्रदेश के मुखिया ह खुदे संज्ञान लेके मोला मिले ल बलाइस ये मोर बर बहुत बड़का बात हे।