आयुष के 4 अगस्त ले आयोजित विशेष ओपीडी म कुल 9296 मनखे मन के होइस इलाज
रायपुर, प्रदेश म आयुष संचालनालय (आयुर्वेद, योग अऊ प्राकृतिक चिकित्सा, यूनानी सिद्ध अऊ होम्योपैथी) के सबो आयुष संस्था मन म हर महीना के पहिली बिरसपत के सियान जतन क्लीनिक के आयोजन करे जात हे। ए क्लीनिक मन म 60 साल ले जादा उमर के सियान मन के निःशुल्क जांच अऊ उपचार करे जाथे। चालू अगस्त महिना के पहिली बिरसपत 4 अगस्त के प्रदेश भर के सियान जतन विशेष ओपीडी म कुल 9296 सियान मन के निःशुल्क इलाज करे गीस।
आयुष विभाग के सहायक संचालक डॉ. विजय साहू ह जानकारी दीस के डाइरेक्टर आयुष श्री पी. दयानंद के निर्देशन अऊ मार्गदर्शन म राज्य के सबो जिला मन के शासकीय आयुर्वेद, होम्योपैथी औषधालय, यूनानी औषधालय, जिला आयुर्वेद चिकित्सालय, आयुष पॉलीक्लीनिक, आयुष विंग, स्पेशलाइज्ड थैरेपी सेंटर, स्पेशियलिटी क्लीनिक अऊ सामुदायिक अऊ प्राथमिक स्वास्थ्य केन्द्र मन म संचालित सह-स्थापित आयुष केन्द्र अऊ आयुर्वेद महाविद्यालय चिकित्सालय मन म सियान मन बर विशेष ओपीडी के संचालन करे गीस। ये बेरा म वृद्धावस्था ले संबंधित विकार अऊ व्याधि मन के संगेच कई ठन शारीरिक अऊ मानसिक रोग मन के आयुष के माध्यम ले उपचार प्रदान करे जात हे। ए विशेष ओपीडी म सियान मन ल सबो प्रकार के चिकित्सा जांच अऊ इलाज निःशुल्क प्रदान करे जात हे। संगे संग मरीज़ मन के स्वास्थ्य के बेहतर देखभाल बर काउंसलिंग घलोक करे जात हे। डॉ. साहू के बताती सियान जतन क्लिनिक म इलाज बर अवइया सियान मन के विस्तृत विवरण घलोक रखे जात हे। ताकि भविष्य म जरूरत परे म ए मरीज मन के फॉलो-अप घलोक करे जा सकय। नागरिक मन के स्वास्थ्य बेहतर रहय अऊ ओ मन ल कोनो प्रकार के दिक्कत के सामना झन करना परय, ते पाए के कई स्तर म काम होवत हे। इही कड़ी म आयुष ह 4 अगस्त के आयोजित प्रदेश के दू आयुर्वेद चिकित्सा महाविद्यालय मन के सियान जतन क्लिनिक मन म 85, पांच जिला आयुर्वेद अस्पताल मन म 253, स्पेशलाइज्ड थैरेपी सेंटर्स म 353, आयुष विंग्स म 242, आयुष पॉलीक्लीनिक मन म 184, औषधालय मन म 6317 अऊ सामुदायिक व प्राथमिक स्वास्थ्य केन्द्र मन म संचालित सह-स्थापित आयुष केन्द्र मन म 1862 सियान मन के इलाज करे गीस।
