रायपुर, विश्व आदिवासी दिवस के अवसर म अखिल भारतीय गोंडवाना गोंड महासभा अऊ आदिवासी समाज कोति ले आयोजित कार्यक्रम म मुख्य अतिथि श्री भूपेश बघेल ह कहिन कि छत्तीसगढ़ म आदिवासी मन के उत्थान के दिशा म काम करे जात हे। ऊंखर मान-सम्मान ल बढ़ाए के संग गौरवशाली कला, संस्कृति ल सहेजे अऊ संरक्षित करे बर कदम उठाए गए हे। ये समाज बहुत ही न्याय प्रिय अऊ प्रकृति के बहुत समीप रहके उन्मुक्त जीवन जीयइया लोकतांत्रिक समाज ये।
मुख्यमंत्री ह कहिन कि छत्तीसगढ़ सरकार बने के संगेच लोहंडीगुड़ा म आदिवासी मन के जमीन वापसी के संग ओ मन ल ऊंखर क्षेत्र म शिक्षा, स्वास्थ्य के दिशा म काम करे गीस। पेसा कानून लागू करके ऊंखर हित ल संवर्धित करे जात हे। आदिवासी मन ल ऊंखर अधिकार देहे जात हे। उमन 9 अगस्त के विश्व आदिवासी दिवस अऊ अगस्त क्रांति दिवस के सब मन ल बधाई दीन।
कार्यक्रम ल गोंड महासभा के राष्ट्रीय अध्यक्ष व संसदीय सचिव विधायक श्री शिशुपाल सिंह शोरी, संसदीय सचिव व विधायक श्रीमती रश्मि आशीष सिंह ठाकुर, प्रदेशाध्यक्ष श्री नीलकंठ टेकाम आदि ह घलोक संबोधित करिन। ये बेरा म विधायक श्री शैलेष पाण्डेय, पर्यटन मण्डल के अध्यक्ष श्री अटल श्रीवास्तव, महापौर श्री रामशरण यादव, जिला पंचायत अध्यक्ष श्री अरूण सिंह चौहान, संभागायुक्त डॉ. संजय अलंग, आईजी रतनलाल डांगी, कलेक्टर श्री सौरभ कुमार, वरिष्ठ पुलिस अधीक्षक श्रीमती पारूल माथुर संग देश के अलग-अलग राज्य ले आए आदिवासी समाज के मनखे बड़ संख्या म उपस्थित रहिन।
