रायपुर, आजादी के अमृत महोत्सव के तहत आज 11 ले 17 अगस्त तक ‘हर घर तिरंगा‘ अभियान के तहत छत्तीसगढ़ राज्य म जन-जन के भागीदारी दिखत हे। इही कड़ी म रायपुर के मठपुरैना स्थित शासकीय मूकबधिर स्कूल के बालक अऊ बालिका मन ह ‘हमर तिरंगा’ थीम अऊ आन विषय मन म बढि़या सुग्घर कलाकारी बनाइन। ए पढ़ईया लईका मन ल दू वर्ग म पहिली, दूसरी अऊ तीसर पुरस्कार देके सम्मानित करे गीस। विद्यालय के सबो भाग लेवइया लइका मन ल सांत्वना पुरस्कार देहे गीस।
प्रतियोगिता म हाई स्कूल अऊ उच्चतर माध्यमिक वर्ग म पहिली स्थान श्री कृष्णा साहू, दूसर पुरस्कार श्री दुर्गेश कौशिक अऊ तीसर पुरस्कार श्री लुकेश्वर ह पाइस। माध्यमिक अऊ प्राथमिक वर्ग म पहिली स्थान गगन साहू, दूसर पुरस्कार श्री चित्रांश अऊ तीसर पुरस्कार श्री युगेश ह अर्जित करिस। प्रतियोगिता म भाग लेवइया दृष्टिबाधित श्री कुशल निषाद ल घलोक सम्मानित करे गीस। ये बेरा म शाला के प्रभारी अधीक्षक श्री त्रिपाठी, सेवानिवृत्त मुख्य चिकित्सा अऊ स्वास्थ्य अधिकारी डॉ. आर.एस. गुप्ता अऊ विद्यालय के स्टाफ, ड्राइंग शिक्षक अऊ विद्यार्थी उपस्थित रहिन।
